Qazaqstanda birjolǵy zeınetaqy tólemderin ıpoteka boıynsha negizgi qaryzdy óteýge, aı saıynǵy tólemdi azaıtýǵa jáne kredıt merzimin qysqartý úshin paıdalanýǵa ruqsat etilýi múmkin.
Ónerkásip jáne qurylys mınıstrligi buıryq jobasyn ázirlegen, -dep habarlaıdy Aqshamnews.kz.
Qujat «Ashyq NQA» portalynda jarıalanǵan.
Qujat «Qazaqstan Respýblıkasynyń zańnamasyna sáıkes turǵyn úı jaǵdaılaryn jaqsartý úshin birjolǵy zeınetaqy tólemderin paıdalaný qaǵıdalaryn bekitý týraly» QR Indýstrıa jáne ınfraqurylymdyq damý mınıstriniń 2021 jylǵy 21 qańtardaǵy № 24 buıryǵyna túzetýler engizýdi kózdeıdi.
Joba «Turǵyn úı qatynastary týraly» Qazaqstan Respýblıkasy Zańynyń 10-2-babynyń 10-27) tarmaqshasyna sáıkes ázirlengen.
-Ózgeristerdiń negizgi maqsaty qaǵıdalardy jańa Salyq kodeksiniń normalaryna sáıkestendirý jáne azamattardyń bankter aldyndaǵy boryshtyq júktemesin azaıtý. Endi zeınetaqy jınaqtaryn negizgi qaryzdy óteý, aı saıynǵy tólemdi azaıtý nemese ıpotekalyq qaryz merzimin qysqartý úshin paıdalaný múmkindigi naqtylanady, -delingen qujatta.
Sondaı-aq qujat qabyldanǵan jaǵdaıda turǵyn úıdi jaqsartý úshin birjolǵy zeınetaqy tólemderin paıdalanýdyń tıimdi tetikteri bekitiledi.
Atalǵan buıryq 2025 jylǵy 21 qarashaǵa deıin qoǵamdyq talqylaýǵa usynylǵan.