Facebook-te áleýmettik jelisinde QR Prezıdentiniń sýreti bar jyl sońyna deıin árbir qazaqstandyqtyń kartasyna 150 myń teńgeden túsetini týraly post jarıalandy. Bul jalǵan aqparat.
Qazaqstannyń memlekettik organdarynyń saıttarynda, onyń ishinde QR Prezıdentiniń akorda.kz saıtynda mundaı tólemder týraly resmı aqparat joq. Bul týraly buqaralyq aqparat quraldarynda da habarlanbady.
Atalǵan aqparatty jarıalaǵan «Ótemaqy ortalyǵy» dep atalatyn akkaýntta feık paraqshanyń barlyq belgileri baıqalady.
Profılde keltirilgen málimetterde +52 kody bar baılanys telefony jazylǵan, bul Meksıkanyń kody. Al sýretke Qazaqstannyń eltańbasy qoıylǵan. Biraq jarıalanymdar lentasynda onyń ornynda buryn Belarýs Respýblıkasynyń eltańbasy bolǵanyn kórýge bolady.
Bul kıberqylmyskerlerdiń áreketi. «Ótemaqy ortalyǵy» arqyly ótemaqy tóleý – bul eski alaıaqtyq sqema, QR memlekettik tehnıkalyq qyzmetiniń KZ-CERT sarapshylary ol týraly 2020 jyly qazaqstandyqtarǵa eskertken bolatyn.
Demek, taralǵan aqparatqa senbegen jón.