"Altaı" klýby - Azıa chempıony
Taılandtyń Nakhonrachasıma qalasynda áıelder arasyndaǵy voleıboldan klýbtyq Azıa chempıonatynda qazaqstandyq "Altaı" klýby chempıon boldy, dep habarlaıdy Almaty-akshamy.kz QazAqparatqa sileme jasap.
Taılandta 1 qazan kúni áıelder voleıbol klýbtary arasynda Azıa chempıonaty bastalǵan edi. Bul týrnırge Qazaqstan atynan shyǵysqazaqstandyq «Altaı» jáne taldyqorǵandyq «Jetisý» klýbtary qatysty.
Odan bólek, birinshilikke bes komanda qatysty. Olardyń ishinde fıllıpındik «PVL» men «Rebısko», ırandyq «Saıpa», taılyq «Sýprım Chonbýrı» men týrnır ıeleri «Nahon Rachasıma Qmin C» klýbtary boldy.
Birinshi oıyn kúni Qazaqstannyń qazirgi chempıony «Altaı» voleıbol klýby fıllıpındik «Rebısko» komandasymen oınady. Oıyn úsh setke sozyldy, nátıjesinde 3:0 upaımen shyǵysqazaqstandyq komanda alǵa shyqty. Ekinshi kúni «Altaı» oıynshylary dál sondaı nátıjemen ırandyq «Saıp» komandasyn oısyrata jeńdi.
Fınaldyq kezeńde qazaqstandyq Altaı voleıbol klýby aqtyq synda jarys qojaıyndary Nakhonrachasıma voleıbol klýbyn 3-0 esebimen jeńip, chempıon atandy.