Energyprom.kz málimetinshe, Qazaqstanda 300 myńnan astam stýdent týǵan qalasynan jyraqta bilim alyp jatyr, dep habarlaıdy aqshamnews.kz
Alaıda olardyń barlyǵyna jataqhanadan oryn tabyla bermeıdi. Ár úshinshi stýdentke jataqhana qajet, biraq olardyń tek úshten ekisi ǵana jataqhana alady.
Suranys pen usynys
2025 jyldyń basyndaǵy derekterge sáıkes, el boıynsha 131,4 myń stýdent jataqhanaǵa muqtaj. Biraq sonyń tek 95,9 myńy ǵana jataqhanadan oryn alady. Bul jalpy qajettiliktiń shamamen 73 paıyzy. Qalǵan stýdentter páter jaldap turýǵa májbúr.
Alaıda bul kórsetkish barlyq óńirde birdeı emes. Keıbir oblystarda jataqhana tapshylyǵy óte joǵary. Mysaly, el boıynsha eń kóp stýdent Almaty – 123,5 myń, Astana – 51,9 myń jáne Shymkent – 28,5 myń qalalarynda oqıdy. Almaty men Astanada árbir ekinshi stýdent jataqhanaǵa muqtaj. Bul qalalarda suranys óte joǵary.
Eń qıyn jaǵdaı Aqtóbe oblysynda. Munda jataqhanaǵa muqtaj stýdentterdiń úlesi 70 paıyzǵa jýyq, biraq olardyń tek jartysy ǵana (50,4%) jataqhanadan oryn alady. Soltústik Qazaqstan (68,8%), Túrkistan (58,5%) , Abaı oblystarynda (55,4%).
Stýdentterge arnalmaǵan jataqhanalar
2025 jyldyń qańtar–maýsym aılary aralyǵynda el boıynsha 22 jańa jataqhana paıdalanýǵa berilgen. Biraq olardyń tek altaýy ǵana naqty stýdentterge arnalǵan. Taǵy 4 jataqhana – otbasylyq úlgidegi, al qalǵandary – jumysshylar men mıgranttarǵa arnalǵan ǵımarattar.
Jańa jataqhanalar salynǵan óńirler:
Atyraý oblysy – 6
Astana qalasy – 4
Aqmola jáne Mańǵystaý oblystary – árqaısysynda 3 jataqhanadan
Alaıda suranysy eń joǵary óńirler – Almaty men Aqtóbe oblystarynda bıyl birde-bir stýdenttik jataqhana salynbaǵan. Abaı jáne Qyzylorda oblystary boıynsha naqty málimetter joq.
Stýdentter sany artyp keledi
2025 jyldyń birinshi toqsanynda basqa aımaqtardan 8,9 myń stýdent kelgen. Bul ótken jylmen salystyrǵanda 25 paıyzǵa kóp. Eń kóp ósim Almaty qalasynda – 2,1 myń stýdent. Odan keıin Astana, Shymkent, Almaty jáne Túrkistan oblystary ornalasqan. Pavlodarda stýdent sany ózgerissiz qalsa, Ulytaý men Aqmola oblystarynda azaıǵan.