Qazaqstannan jeti komanda AQSH-tyń Húston qalasynda ótetin FIRST Championship atty mektep oqýshylaryna arnalǵan eń bedeldi ınjenerlik jarysqa attandy.
Baıqaýǵa qatysýshynyń eń kishisi — nebári 6 jasta, dep habarlaıdy QR Oqý-aǵartý mınıstrliginiń baspasóz qyzmeti.
Bıyl chempıonat 110 elden kelgen 50 myńnan astam jas ınjener men ónertapqyshtardy biriktirdi. 2025 jylǵy maýsymynyń taqyryby — sýasty álemin zertteý jáne qorǵaý.
Bıyl Qazaqstan bul baıqaýǵa buryn-sońdy bolmaǵan aýqymda — birden 7 komandamen qatysyp otyr. Joldamanyń kóbeıýi — elimizdiń mektep robototehnıkasynyń halyqaralyq bedeli artyp kele jatqanyn kórsetedi.
«Bizdiń komandalar — maýsymnyń basty favorıtteri. Qazaqstannyń qorjynyna taǵy da júldeler men jeńister qosylady dep úmittenemiz», — dedi USTEM Foundation qoǵamdyq qorynyń jetekshisi Asylbek Mýrzahmetov.
Qazaqstan quramasy Ortalyq Azıa chempıonaty — Almaty Tech Cup nátıjesinde irikteldi. El atynan qatysyp jatqan komandalar: Atlantis — «Satýrn» mektebi, Pavlodar qalasy;
PID — Nazarbaev zıatkerlik mektebi, Almaty qalasy;
Cristabol — Nazarbaev zıatkerlik mektebi, Almaty qalasy; Skillset — «Skillset» mektebi, Astana qalasy;
JelToqSun jáne Rasslexx — «Murager» mektebi, Qaraǵandy qalasy.
Aıta keteıik, Qazaqstan — FIRST GLOBAL robototehnıkasynan 190-nan astam el qatysatyn álem chempıonatynyń úsh dúrkin jeńimpazy: Jeneva (2022), Sıngapýr (2023), Afına (2024).