Almatyda 184 myńnan astam adam kásibin dóńgeletip otyr.
Bıyl Qazaqstanda jekemenshik kásipker retinde tirkelgender sany 26 paıyzǵa artty, dep habarlaıdy Almaty-akshamy.kz Almaty.tv silteme jasap.
Jumys istep turǵandardyń basym bóligi Almatyda ornalasqan. Qazir megapolıste 184 myńnan astam adam kásibin dóńgeletip otyr. Bul ótken jyldyń sáıkes merzimimen salystyrǵanda shamamen 60 paıyz kóp. Úzdik úshtikke Túrkistan oblysy jáne Astana qalasy endi.
Kásipkerlikti qoldaý aıasynda jumys aýqymy keńeıdi. Almatynyń ındýstrıaldy aımaǵynda osydan 1 jyl buryn ashylǵan ishki esikter shyǵaratyn seh qazir taýarlaryn Qazaqstannyń 16 óńirine satady. Kásiporynda 120 adam eki qolǵa bir kúrek tapqan. Elimizde jasalǵan esikter sapaly ári baǵasy naryqtan 40 paıyz tómen. Kásip ıesi Azat Qalıollauly mıllıardtaǵan qarjyny syrtqa quıǵansha, otandyq kásipti qoldaý anaǵurlym utymdy ekenin aıtady. Sondyqtan jas kásipkerlerdi ózimizdiń ónimimizdi kóbeıtýge shaqyrdy.
Búginde «Almaty Business-2025» baǵdarlamasy aıasynda 23 mıllıardtan astam qarjyǵa 404 joba qarjylandyrylǵan. 3045 jumys orny ashyldy. Al fabrıkanyń damýyna zor múmkindik bergen – Almaty qalasynyń ákimdigi. Kásipkerlikti qoldaıtyn basqarma olarǵa 5 jyl boıy baǵasy ózgerissiz qalatyndaı etip, jerdi jalǵa bergen. Al Almaty fınans mekemesi jeńildetilgen nesıemen qamtasyz etken.
«Qalanyń ishinde turyp, bizge osyndaı múmkindik berip jatqan memleket. Munda elektr jaryǵy da ótkizlgen. Barlyq jaǵdaı jasalǵan. Almaty Finance degen ákimshilikke qatysty uıym bar, arnaıy baǵdarlamalary bar. Jospary bar, óndiris asham degen balalarǵa múmkindik bar», – dedi İshki esikter fabrıkasynyń dırektory Azat Qalıollauly.
Qazir Qazaqstanda jasalǵan ónimge tapsyrys ulǵaıǵan. Máselen, Almatyda salynyp jatqan bilim ordalaryna osy kompanıanyń esikteri ornatylypty. Kásipkerdiń sózinshe, eger taýar syrttan alynsa, aıtarlyqtaı qymbatqa túsetin edi. Fabrıka aıyna tapsyrysqa qaraı 10-15 myń esik shyǵarady. Al jylyna 120 myńnan astam taýar óndiredi. Bolashaqta kásiporyndy keńeıtý de josparda bar eken.