Aǵylshynnyń ataqty «Chelsı» fýtbol klýby 16 jastaǵy qazaqstandyq shabýylshy Dastan Satpaevty óz akademıasyna qabyldady. Buryn ol «Qaırat» klýbynyń jasóspirimder komandasynda oınap, joǵary sheberligimen kózge túsken. Bul týraly BBC jýrnalısi Nızar Kınsella áleýmettik jelidegi paraqshasynda habarlady.
Satpaev ótken jyldyń jeltoqsan aıynda «Chelsıde» synaqtan ótken. Jas shabýylshynyń sheberligi klýb ókilderin qatty tań qaldyrǵan. 2024 jylǵy maýsymda Dastan Qazaqstannyń U-19 quramasynda jáne QJ lıgasynda oınap, tamasha nátıjeler kórsetti. 12 machta ol 19 gol soǵyp, 7 nátıjeli pas bergen.
Eýropa klýbtarynyń Ortalyq Azıa oıynshylaryna degen qyzyǵýshylyǵynyń ósýi baıqalady. Buǵan deıin «Manchester Sıtı» ózbek qorǵaýshysy Abdýkodır Hýsanovpen kelisimshart jasasqan edi. Endi «Chelsı» de osy baǵytty ustana otyryp, qazaqstandyq jas talantqa senim artýda.
Satpaevtyń resmı tanystyrylymy onyń 18 jasqa tolǵannan keıin ótedi dep kútilýde. Qazirgi ýaqytta «Qaırat» pen «Chelsı» arasyndaǵy kelisimniń egjeı-tegjeıleri jarıalanǵan joq. Degenmen, BBC ınsaıderiniń málimetinshe, barlyq taraptar kelisimge kelgen.
Aldaǵy ýaqytta Dastan «Chelsıdiń» jasóspirimder komandalarynda óner kórsetedi. Eger ol aǵylshyn fýtbolyna sátti beıimdelse, negizgi quramǵa kirýge múmkindik alady.