Dári júzimnen alynǵan organıkalyq qosylystarǵa negizdelgen
Kúndelikti kúızelis, zıandy ádetter men aýanyń lastanýy – osynyń bári aǵzada bos radıkaldardyń paıda bolýyna ákeledi. Al bos radıkaldar saý jasýshalarǵa shabýyl jasaıdy. Ǵalymdardyń aıtýynsha, qartaıýdyń negizgi sebebi osy. Alaıda bul úrdisti tejeıtin tabıǵı ónim tabyldy, dep habarlaıdy Almaty-akshamy.kz 24.kz saıtyna silteme jasap.
Ol ósimdikterde kóp kezdesetin – polıfenol.
«Jerorta teńizi qubylysy» dep atalatyn zertteý nátıjeleri jarıalanǵan kezde búkil álem polıfenolmen, sonyń ishinde júzimmen aınalysa bastady. Óıtkeni sol kezde polıfenoldardy kóp tutynatyn adamdarda ınfarkt pen ınsýlt sany kúrt tómendegeni anyqtaldy», - deıdi Ómir týraly ńylym ortalyǵynyń jetekshi ǵylymı qyzmetkeri Aleksandr Gýláev.
Qazaqstandyq ǵalymdar polıfenoldardy jáne olardyń aǵzaǵa áserin 10 jyl boıy zerttedi. Nátıjesinde, keıbir aýrýlardyń aldyn alatyn biregeı otandyq ónimdi jasap shyǵardy. Atap aıtsaq, súıektiń synǵyshtyǵy, salmaq jınaý men joǵary qan qysymymen kúreste polıfenol tıimdi ekeni anyqtaldy. Ǵalymdar júzimniń quramyndaǵy polıfenoldar tabıǵı ózgeristerdi tejeıdi degen tujyrymǵa keldi.
«Biz júzimniń ártúrli sorttaryn synap kórdik. Sosyn bizge qajet polıfenoldardyń mólsheri bar eki sort tańdaldy. Bul otandyq seleksıanyń saperavı jáne kaberne-sovınon sorttary. Olar – elimizdiń ońtústigindegi kópjyldyq Qazaqstandyq seleksıa», - deıdi Ómir týraly ǵylymdar ortalyǵynyń jetekshi ǵylymı qyzmetkeri Aleksandr Gýláev.
Zertteýshilerdiń aıtýynsha, júzimnen jasalǵan ónim úlken, kishi bolsyn bárine keledi. Tek alergıasy bar, jedel respıratorlyq aýrýlary bar, aıaǵy aýyr jáne bala emizetin áıelderge ǵana shekteý bar. 2018 jyly preparatty óndirýshiler ǵylym qorynan grant utyp alǵan. Al úsh jyldan keıin Jezqazǵanda adam jasyn uzartatyn «júzim elıksıri» jasala bastady.
«Aqpan aıynyń sońynda osy grantty qarjylandyrýdy tolyq aıaqtaımyz. Biz negizgi baǵyttardyń bárin qamtydyq. Mysaly, zaýyt ashyldy, óndiris jumys isteıdi, alǵashqy satylymdar bastaldy. Tıisinshe, joba sátti shyqty deýge bolady», - «Ǵylym qory» AQ basqarma tóraǵasy Aryn Orsarıev.
Ǵalymdar «júzimnen jasalǵan» ónim dári emes, tek emdeý kezindegi kómekshi qural dep eskertedi. Biraq kóp uzamaı ol medısınalyq ortalyqtarǵa da jetkiziledi. Al bolashaqta polıfenoldardy kosmetologıaǵa engizý josparlap otyr. Otandyq ǵalymdardyń jobasyna Reseı men Qyrǵyzstan tarapynan qyzyǵýshylyq bar.