Úkimette vıse-premer Serik Jumanǵarınniń tóraǵalyǵymen kúzgi dala jumystary máseleleri jónindegi jedel shtabtyń birinshi otyrysy ótti.
Shtab úzdiksiz egin jınaý naýqanyna kedergi keltiretin taktıkalyq máselelerdi dereý sheshý maqsatynda qurylǵan, dep habarlaıdy aqshamnews.kz Aýyl sharýashylyǵy mınıstrligine silteme jasap.
Ákimdikterdiń, qarjy ınstıtýttarynyń, memlekettik organdardyń, «Báıterek» UBH» AQ jáne «QTJ» UK» AQ jumysyn úılestirý Úkimettiń baqylaýymen júzege asyrylatyn bolady. Jaqyn arada Aýyl sharýashylyǵy mınıstrligi men «Azyq-túlik korporasıasy» AQ ókilderi jergilikti jerlerde egin jınaý jumystaryn jedel basqarý úshin óńirlerge barady. 23 tamyzda vıse-premer Serik Jumanǵarın elimizdiń negizgi astyq egetin óńirleriniń biri - Aqmola oblysyna barady.
QR ASHM 20 tamyzdaǵy jedel derekterine sáıkes, elimizde 2,2 mln tonna astyq bastyrylyp, 1,1 mln tonnasy jınaldy. Ondaǵy daqyldardyń 76%-y jaqsy, 22%-y qanaǵattanarlyq dep baǵalanyp otyr. Egin jınaý qarqyny byltyrǵy jylmen sáıkes deýge bolady, biraq tolassyz jaýǵan jańbyr jappaı jumys isteýge jáne dándi daqyldardyń tolyq pisýine kedergi keltirýde. Osyǵan baılanysty Jedel shtab otyrysynda óńirlerdi astyq keptirý agregattarymen jáne olarǵa arnalǵan otynmen qamtamasyz etý máselesi qaraldy.
Aýyl sharýashylyǵy vıse-mınıstri Azat Sultanovtyń aıtýynsha, búgingi tańda negizgi astyq egetin óńirlerde táýligine jalpy qýaty 820,6 myń tonna bolatyn 1301 astyq keptirý agregaty bar. Osy keptirý agregattarynyń jumysy úshin 61 myń tonna arzandatylǵan dızel otynyna ótinimder kelip tústi. Biraq keıbir oblystarda keptirgishter suıytylǵan gazben jumys isteıdi, sondyqtan bul qondyrǵylarǵa arzandatylǵan gaz qajet.
Óz kezeginde Premer-Mınıstrdiń orynbasary S. Jumanǵarın QR ASHM men EM-ge keptirý agregattary úshin qajetti suıytylǵan gaz kólemin eseptep, fermerlerdi arzandatylǵan otynǵa kezekte turǵandar tizimine qosýdy tapsyrdy. Sondaı-aq ákimdikterge fermerlerdiń mobıldi keptirý agregattaryna degen qajettiligin esepteý, al qarjy ınstıtýttaryna atalǵan qurylǵylardy satyp alýdy sýbsıdıalaý múmkindigin pysyqtaý tapsyryldy.
Jańa astyqty ishki naryqqa jáne eksportqa úzdiksiz jetkizýdi uıymdastyrý, jyljymaly quramdy jedel úılestirý jáne basqarý úshin Aýyl sharýashylyǵy, Kólik mınıstrlikteri, Azyq-túlik korporasıasy, QTJ jáne ákimdikter apta saıyn, al jappaı egin jınaý kezeńinde – kún saıyn selektorlyq keńester ótkizedi.