Mońǵol ulty men baıyrǵy rýlardyń qazaq genetıkasymen sáıkestigin anyqtaý maqsatynda qazaqstandyq bir top ǵalym Mońǵolıaǵa ekspedısıaǵa attanady.
Zertteýshiler elimizdiń azamattarynan jınalǵan gendik test pen qan úlgilerin Mońǵolıanyń kishi etnıkalyq toptarynyń azamattarymen salystyrmaq. Osylaısha, ǵalymdar ortaq týystyq belgiler men etnıkalyq sáıkestikterdi anyqtaıdy, dep Almaty-akshamy.kz
Zertteýdiń maqsaty aıqyn, endi ony iske asyryp, nátıjesin etnogenez salasyndaǵy ǵylymı jańalyq retinde jarıalaý josparda bar.
"Ol jaqta da ártúrli mońǵol tildes etnıkalyq toptar bar. Solardyń ártúrliligin zertteımiz genetıka arqyly. Qazirgi turyp jatqan mońǵol tektes toptardyń qaısysy jaqyn, qaısysy alys ekenin anyqtaý úshin sol jaqqa baryp, etnografıalyq derekterin jınaımyz, sonymen qosa dnk-syn jınaımyz", - UBO adam genetıkasy zerthanasynyń meńgerýshisi Maqsat Jabaǵın.
Qazaq ǵalymdary Mońǵolıa jeriniń buryn osyndaı zertteý júrgizilmegen batys jáne shyǵys óńirlerin qamtymaq. Turǵyndardan jınalǵan DNQ úlgileri arnaıy bıobankte saqtalyp, elge jetkiziledi.
"Mońǵolıanyń negizgi halqy jaqsy zerttelgen, ony ári qaraı qazbalaý maqsatymyz emes. Buryn ǵalymdar nazaryna kóp ilikpegen toptar bar. Naıman, qońyrat, kereı sekildi iri rýlar 700-den asa jyl buryn Mońǵolıada turyp, kóshpeli dástúr kezeńinde qazaq jerine qonys aýdarǵan. Solardyń elimizdegi basqa da rýlarmen gendik sáıkestigin bilemiz", - UBO Bas dırektory Erlan Ramanqulov.
Qazaq halqy Jer betinde óz shejiresin jaqsy biletin az ulttardyń qatarynda, deıdi ǵalymdar. Zamanaýı ǵylym men tehnologıa ony dáleldeýge múmkindik berip otyr. Ókinishtisi, kóshpeli halqymyzdyń tarıhı oqıǵalary saqtalǵan jazbalar az. Derekti materıaldar tapshylyǵyn eskersek, tyń málimetter tarıhshylar, arheologtar men paleontologtar úshin qundy bolary sózsiz.