Táýelsiz baıqaýshylar saılaýdyń adal jáne ádil ótýine óz úlesin qosýǵa daıyn.
25 shilde kúni Qazaqstan boıynsha bir mezgilde 700-den astam aýyl ákimderin saılaýy ótedi. Bul saıası proseske táýelsiz baqylaýshylar da qatysýǵa daıyn, dep habarlaıdy Almaty –akshamy.kz.
Aǵymdaǵy jyldyń shilde aıynda Jambyl oblysynyń 89 saılaý ýchaskesinde, al keıingi aılarda 9 ýchaskede aýyldyq okrýg ákimderiniń saılaýy ótkiziledi. Buǵan «Partıalyq emes baqylaý ortalyǵynan» 194 baıqaýshy qatysady. QazAqparat habarlaǵandaı, bul týraly «Partıalyq emes baqylaý ortalyǵy» respýblıkalyq qoǵamdyq birlestiginiń Jambyl oblysy fılıalynyń jetekshisi Asqar Qadyrqulov aıtty.
«Aýdandyq mańyzy bar qalalardyń, aýyldardyń, kentterdiń, aýyldyq okrýg ákimderiniń tóte saılaýy – bul Qazaqstan Respýblıkasynyń demokratızasıalaý prosesindegi jańa qadam. Qazaqstannyń Konstıtýsıasynda belgilengen demokratıalyq qaǵıdalar bizdiń elde ary qaraı da júzege asyryla beredi. Bolashaqta aýdan jáne oblys ákimderin saılaýyn uıymdastyrý josparlanýda. Saılaý kezinde eń bastysy – ony ótkizý barysynda saılaý prosesiniń zańdylyǵy men ashyqtyǵyn saqtaý. Ol úshin bizde saılaýdy baqylaý salasynda úlken tájirıbesi bar top quryldy. Bizdiń qoǵamdyq birlesitiktiń atynan qatysatyn táýelsiz baıqaýshylar saılaýdyń adal jáne ádil ótýine óz úlesin qosady dep senemin», - dedi Asqar Qadyrqulov.
Qazirgi ýaqytta ortalyq óziniń baıqaýshylary úshin birqatar oqytý semınarlary men trenıńter ótkizýde.