Bıyl ekinshi jyl qatarynan elimizde Qurban aıt merekesi onlaın rejımde atalyp ótip jatyr.
Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Qurban aıttyń kelýimen quttyqtady, dep habarlaıdy Almaty-akshamy.kz QMDB-nyń baspasóz qyzmetine silteme jasap.
«Asa Qamqor, erekshe Meıirimdi Allanyń atymen bastaımyn! Qurmetti jamaǵat, qadirli otandastar! Barshańyzdy ulyq meıram – Qurban aıttyń kelýimen shyn júrekten quttyqtaımyn! Aıt qabyl bolsyn! Sizderge amandyq pen saýlyq, birlik men bereke tileımin. Baǵzy zamannan beri ıslam dinin ustanyp kele jatqan halqymyz Qurban aıtty erekshe daıyndyqpen qarsy alady. Ulyq meıramda úlkenge qurmet, kishige izet kórsetý, kóńili jabyrqaǵan janǵa qýanysh syılaý, muqtaj adamǵa qurbandyq etin taratyp, saýap alý syndy izgi amaldar urpaqtan-urpaqqa jalǵasyp keledi», -dedi Naýryzbaı qajy.
Bas múftıdiń túsindirýinshe, «qurban» sózi «jaqyn bolý», «jaqyndaý» degen uǵymdy bildiredi. Bul – shynaıy nıet pen Allaǵa degen súıispenshilikti pash etetin meıram. Ulyq merekeniń tárbıelik máni men maǵynasy osynda jatyr. Qasıetti Quranda: «Umytpańdar, olardyń eti de, qany da eshqashan Allaǵa jetpeıdi. Oǵan jetetin nárse – júrekterińizge uıalaǵan taqýalyqtaryń (shynaıy nıetteriń)» («Haj» súresi, 37-aıat), – delingen. Aıatta aıtylǵandaı, Qudaı jolynda jaqsylyq jasaýǵa nıettengen pende bul amaldy rıasyz oımen oryndaıdy. Qarjylaı múmkindigi bar ári jolaýshy emes musylmanǵa qurbandyq shalý – ýájip, musylmandyq mindet. Al shamasy kelmegen adamǵa Alla Taǵala mundaı mindet júktemegen. Aıt kúnderi az da bolsa sadaqa berip, qaraýsyz qalǵan qarttarǵa, jetimder men kópbalaly otbasylarǵa kóńil bólý – saýapty is.
«Adam balasy qurbandyq shalý arqyly Allanyń bergen rızyq-nesibesine shúkir etedi. Kómekke muqtaj janǵa qol ushyn berip, aınalasyna shýaǵyn túsirip, shapaǵatyn tıgizedi. Musylman qaýymyn meıirimdilik pen birlikke úndeıtin merekede barynsha jaqsylyq jasaýǵa tyrysaıyq. Ásirese, álemdi sharpyǵan juqpaly dertpen naýqastanyp, shıpa tilegen jandarǵa kómektesip, olarǵa duǵa etip qoıǵanymyz abzal. Alla Taǵala elimiz ben jerimizdi, barsha adamzat balasyn túrli synaqtardan aman etip, jaqsylyǵy men berekesin násip etkeı. Shalǵan qurbandyqtaryńyz, bergen sadaqalaryńyz, aıt kúnderi amalǵa asyrǵan Allaǵa unamdy árbir ıgi isterińiz qabyl bolǵaı. Aıttan aıtqa aman-esen jete bereıik! Ámın!» - dep quttyqtady QMDB-nyń tóraǵasy.