18-29 qyrkúıek aralyǵynda marafonshylar elordadan Túrkistan qalasyna deıin 1200 shaqyrymnan asa qashyqtyqty basyp ótedi.
Mádenıet jáne sport mınıstri Dáýren Abaev elimizde «Uly Dala Joryǵy» atty tuńǵysh respýblıkalyq at marafon-báıgesi ótetini týraly beıneúndeý jasady, dep habarlaıdy Almaty-akshamy.kz Mádenıet jáne sport mınıstrliginiń baspasóz qyzmetine silteme jasap.
«Uly Dala Joryǵy» – elimizdiń 6 aımaǵyn (Nur-Sultan qalasy, Aqmola, Qaraǵandy, Ulytaý, Qyzylorda, Túrkistan oblystary) qamtıtyn tuńǵysh jalpyrespýblıkalyq at marafony.
Marafon Qazaqstan Respýblıkasy Mádenıet jáne sport mınıstrligi qoldaýymen jáne The Great Steppe Tour qoǵamdyq qory men Altyn Qyran Foundation qoǵamdyq qorynyń uıymdastyrýymen ótedi.
Álemdik tájirıbede teńdesi joq bul marafon Uly Dalany mekendegen kóshpendi halyqtyń murasy retinde shabandoz mádenıetin Qazaqstan brendi retinde qalyptastyrýǵa negiz bolady. Buǵan qosa, marafon otandyq týrızm men ulttyq sport salasyn damytýǵa tyń serpin beredi.
Jobanyń maqsaty - Qazaqstanmen tikeleı baılanysty tanymal brend qurý jáne ulttyq mádenıetti halyqaralyq arenada ilgeriletý, jastardy ulttyq mádenıet pen tarıhty zerdeleýge baýlý, sporttaǵy sheberlik pen tózimdilik qundylyqtaryn darytý.
17 qyrkúıekte Nur-Sultan qalasynyń «Qazanat» ıpodromynda 100 shabandozdyń qatysýymen marafonnyń saltanatty ashylýy bolady.
18-29 qyrkúıek aralyǵynda marafonshylar elordadan Túrkistan qalasyna deıin 1200 shaqyrymnan asa qashyqtyqty basyp ótedi.
Marafon 100 shaqyrymdyq 12 satyǵa bólingen. Elimizdiń árbir óńirinen marafonǵa 1 komandadan qatysady. Marafonǵa qatysýshylarǵa Uly Dala rýhyn sezinýge jáne túrkilerdiń kıeli jerleri – Joshy han, Alasha han keseneleri, sondaı-aq Qazaq handyǵynyń alǵashqy astanasy Sozaq qalasy pen túrki rýhanıatynyń besigi Túrkistan qalasy sıaqty tarıhı oryndarǵa, Áziret-Sultan kesenesine zıarat jasaýǵa múmkindik týady.
Sońǵy meje – Túrkistan qalasyna deıin eń qysqa ýaqyt ishinde jetken komanda músheleri bas júlde – «Uly Dala Sarbazy» ataǵy men 30 000 000 teńge kólemindegi júldemen marapattalady. 2-shi jáne 3-shi oryn ıegerleri sáıkesinshe 20 000 000 teńge jáne 15 000 000 teńge júldelerimen marapattalady.
Jarys barysynda barlyq qatysýshylar demalys oryndary, azyq-túlikpen jáne qajetti medısınalyq kómekpen qamtamasyz etiledi.
Budan bólek, BAQ ókilderi úshin marafon aıasynda arnaıy «Uly Dala Jarshysy» kóshpendiler pres-týry ótkiziledi. İrikteýden ótken qatysýshylar marafonnyń baǵyty boıynsha júrip ótip, Uly Dalanyń mádenı turmysyna qanyǵady, Ortalyq jáne Ońtústik Qazaqstannyń geografıasy, ekonomıkasy, toponımıkasy t.b jaıly qundy aqparat alady.
Qosymsha aqparatty qazanat.kz saıtynan bilýge bolady.