QR Bas prokýratýrasy «Prokýratýra týraly» Konstıtýsıalyq zań jobasyn ázirledi.
Zań jobasy prokýratýranyń quqyq qorǵaý áleýetin kúsheıtýge jáne joǵary qadaǵalaý organyn jańǵyrtýǵa, prokýrorlar qyzmetiniń kepildikterin nyǵaıtýǵa baǵyttalǵan, dep habarlaıdy Almaty-akshamy.kz
Zań jobasynda zańdylyqty saqtaýdy neǵurlym tıimdi qamtamasyz etýge, azamattardyń quqyqtary men bostandyqtaryn, bıznestiń, qoǵam men memlekettiń múddelerin qorǵaýǵa jáne qalpyna keltirýge múmkindik beretin pármendi quraldar men tetikterdi bekitý usynylady.
Prokýratýra adamdy, onyń ómirin, quqyqtary men bostandyqtaryn memlekettiń joǵary qundylyqtary retinde qorǵaý, zańnyń ústemdigin qamtamasyz etý jáne QR aýmaǵynda zańdylyqty nyǵaıtý maqsatynda kelesi mindetterdi júzege asyrady:
- Adamnyń jáne azamattyń buzylǵan quqyqtary men bostandyqtaryn, zańdy tulǵalardyń, qoǵam men memlekettiń zańmen qorǵalatyn múddelerin qorǵaý jáne qalpyna keltirý;
- Zańnyń buzylýyn, oǵan yqpal etetin sebepter men jaǵdaılardy, sondaı-aq olardyń saldarlaryn anyqtaý jáne joıý;
- Quqyq qorǵaý jáne ózge de memlekettik organdardyń zańdy, quqyqtyq tártipti jáne qylmysqa qarsy kúresti qamtamasyz etý jónindegi qyzmetin úılestirý;
- Zańdarmen jáne QR Prezıdentiniń aktilerimen aıqyndalatyn ózge de mindetter.
Prokýratýra organdaryna júktelgen mindetter:
- Zańdylyqty joǵary qadaǵalaý:
- Memlekettik, jergilikti ókildi jáne atqarýshy organdardyń, jergilikti ózin-ózi basqarý organdarynyń, mekemelerdiń, kásipkerlik sýbektileriniń jáne menshik nysanyna qaramastan ózge de uıymdardyń qyzmeti, sondaı-aq olar qabyldaıtyn aktiler men sheshimder;
- Laýazymdy jáne ózge de adamdardyń, onyń ishinde sot oryndaýshylary men notarıýstardyń is-áreketteriniń (áreketsizdikteriniń), sondaı-aq olar qabyldaıtyn, kúshine engen aktiler men sheshimderdiń;
- Ákimshilik quqyqbuzýshylyq týraly ister boıynsha is júrgizý;
- Sotqa deıingi tergep-tekserý, qylmystyq qýdalaý, jedel izdestirý jáne qarsy barlaý qyzmeti;
- Atqarýshylyq is júrgizý;
- Zańdy kúshine engen sot aktileriniń tizbesi;
- Qylmystyq jazalardy oryndaý jáne memlekettik májbúrleýdiń ózge de sharalaryn qoldaný;
- Memlekettik quqyqtyq statısıka jáne arnaıy esepke alý;
- Qazaqstan Respýblıkasynyń halyqaralyq mindettemelerin saqtaý;
- Azamattardyń quqyqtary men bostandyǵyn, qoǵam men memlekettiń múddelerin qozǵaıtyn qoǵamdyq qatynastardyń ózge de salalary;
Sonymen qatar prokýratýranyń quzyretine mynalar kiredi:
- Sotta memleket múddesin bildirý;
- Sotqa deıingi tergeý, qylmystyq qýdalaý;
- Qylmystyq-quqyqtyq saladaǵy halyqaralyq yntymaqtastyq;
- Qylmystyq jolmen alynǵan kiristerdi qylmystyq prosesten tys qaıtarý máseleleri boıynsha sheteldik jáne halyqaralyq (memleketaralyq) sottarda, sheteldik jáne halyqaralyq aralyq sottarda (tórelikterde) memlekettiń múddelerin bildirý;
- Zań shyǵarý qyzmetine qatysý;
- Quqyq qorǵaý organdary kadrlaryn daıarlaý jáne olardyń kásibı deńgeıin arttyrý, sondaı-aq bilim berý jáne ǵylymı qyzmet;
- Adamnyń jáne azamattyń quqyqtary men bostandyqtaryn qalpyna keltirýge jáne qorǵaýǵa járdemdesý sheńberinde Adam quqyqtary jónindegi ýákilmen ózara is-qımyl jasaý.
Zań jobasynda prokýratýra organdarynyń óz fýnksıalary men ókilettikterin júzege asyrýy kezinde olardyń qyzmetine qandaı da bir aralasýǵa tyıym salynady delingen.
Zań jobasyn qabyldaý 2023-2025 jyldarǵa arnalǵan respýblıkalyq búdjetten prokýratýra qyzmetiniń quqyqtyq jáne áleýmettik kepildikterin nyǵaıtýǵa 18 754,5 myń teńge qosymsha qarjy shyǵyndaryn talap etedi.
Qujat 7 shildege deıin Ashyq NQA saıtynda jarıa talqylaý úshin ornalastyrylǵan.