Bes aı ishinde ónim kólemi ósken.
Qazaqstan Úkimetiniń músheleri ótken bes aıda aýyl sharýashylyǵynyń shyǵarylymy óskenin aıtyp otyr, dep habarlaıdy Almaty-akashamy.kz Baq.kz silteme jasap.
Úkimet otyrysynda Ulttyq ekonomıka mınıstri Álibek Qýantyrov jyl basynan beri aýylsharýashylyq ónimderiniń jalpy kólemi 1,3%-ǵa ulǵaıǵanyn aıtty.
«Saladaǵy óndiristiń ósýi 11 óńirde tirkeldi. Ósýdiń eń joǵarǵy kórsetkishi Mańǵystaý, Soltústik Qazaqstan jáne Shyǵys Qazaqstan oblystarynda tirkeldi. Eń tómengi kórsetkish Qostanaı, Aqtóbe jáne Batys Qazaqstan oblystarynda baıqalýda. Jeti ekonomıkalyq kórsetkish boıynsha óńirler arasyndaǵy jalpy jaǵdaıǵa toqtalǵym keledi. Barlyq kórsetkishter boıynsha ósý alty óńirde – Aqmola, Almaty, Qyzylorda jáne Shyǵys Qazaqstan oblystarynda, sondaı-aq Nur-Sultan jáne Shymkent qalalarynda baıqalyp otyr», - dedi vedomstvo basshysy.
Sondaı-aq alty kórsetkish boıynsha ósý jeti óńirde tirkeldi.
«Olar Atyraý, Jambyl, Qaraǵandy, Qostanaı, Pavlodar jáne Soltústik Qazaqstan oblystary, sondaı-aq Almaty qalasy», - dep atap ótti mınıstr.
Sonymen qatar ol ortalyq jáne jergilikti atqarýshy organdarǵa kelesi sharalarǵa nazar aýdarý usynylyp otyrǵanyn alǵa tartty.
«Salynyp jatqan obektilerdi ýaqytyly paıdalanýǵa berýdi baqylaýdy qamtamasyz ete otyra, qurylys jumystary maýsymyn tıimdi júrgizý. Áleýmettik mańyzy bar azyq-túlik taýarlary baǵalaryn monıtorıńteý jáne tıisti qalypqa keltirý sharalaryn qabyldaý. Eńbek naryǵyndaǵy turaqtylyqty qamtamasyz etý jáne turaqty jumys oryndaryn qurýdy ekpindi qadaǵalaý. Investısıalardy belsendi tartý jáne ınvestorlarmen núkteli jumys júrgizý, ár ınvestısıalyq jobadan keletin ekonomıkalyq qaıtarymdy maksımızasıalaý qajet», - dedi Álibek Qýantyrov.
Sondaı-aq ol eksporttyq mindettemelerdiń tolyq oryndalýyna járdemdesý jáne eksporttaýshylardy barlyq deńgeılerde qoldaý kerektigin aıtty. Joǵaryda atalǵan sharalardy tolyqtaı iske asyrý el ekonomıkasynyń ósýin jedeldetýge múmkindik beredi dep otyr.