Órt sóndirýshilerge qansha tehnıka qajet?
Tótenshe jaǵdaılar birinshi vıse-mınıstri Ibragım Kúlshimbaev mınıstrliktiń materıaldyq-tehnıkalyq jabdyqtalýy týraly aıtty, dep habarlaıdy Almaty-akshamy.kz
Onyń aıtýynsha, búginde eldi mekenderdi órtten qorǵaıtyn 426 órt sóndirý bólimi jumys isteıdi.
"Biraq bul jetkiliksiz, normatıvqa jetý úshin áli 121 órt sóndirý bólimin salý kerek. Josparda bar. Búgingi kúnniń ózinde jol kartasy boıynsha Qazaqstanda 21 órt sóndirý beketiniń qurylysy júrip jtyr. Qarap otyrsaq, sońǵy on jylda 18 nysan ǵana salynǵan. Byltyrǵy jyldardan bastap osy jumystardy kúsheıte bastadyq", - dedi Kúlshimbaev senat otyrysynda.
Ol TJ mınıstrliginiń tehnıkamen jabdyqtalýy 80 paıyzdy quraıtynyn atap ótti. Qazir 3200 tehnıka bar, áli 430 tehnıka qajet. Onyń ishinde 15 paıyzynyń nemes 470 tehnıkanyń merzimi jıyrma jyldan asyp ketken.
"Osynyń bárin sheshý úshin prezıdenttiń tikeleı tapsyrmasymen keshendi jospar qarastyrylǵan. Búgingi kúni osy keshendi josparǵa barlyq ortalyq memlekettik organ kelisimin berip, qol qoıý satysynda tur. Sol boıynsha naýryz aıynda respýblıkalyq búdjet komısıasynyń otyrysynda qaralyp, 605 mlrd teńge qarjy bólinip otyr. Sonyń ishinde 536 mlrd tótenshe jaǵdaılar mınıstrligine, 48 mlrd teńge ekologıa mınıstrligine, jáne 20 mlrd teńge jergilikti ákimshilik organdaryna", - dedi vıse-mınıstr.
Aıtýynsha, áýe qutqarý júıesin damytý úshin sońǵy úsh jylda 11 tikushaq satyp alyndy. Keshendi jospar boıynsha 2027 jylǵa deıin 16 tikushaq alý josparlanyp otyr.
"Keshendi josparda áleýmettik jaǵdaılar da kózdelgen. Bıyl órt sóndirýshilerdiń jalaqysy jetpis paıyzǵa deıin kóterildi, jospar boıynsha páteri joq qyzmetkerler ótemaqy tóleý úshin aqsha qarastyrylyp otyr", - dedi Kúlshimbaev.