Saılaýǵa baqylaý júrgizetin qoǵamdyq birlestikter men komersıalyq emes uıymdardy akredıtteý ókileti berilmek.
«Ashyq NQA» portalynda Konstıtýsıalyq zańdarǵa ózgerister men túzetýler engizýdi kózdeıtin zańnyń jobasy talqylanyp jatyr. Atalǵan qujatta "Saılaý týraly" zańǵa engizý josparlanǵan ózgerister men túzetýlerdiń tizbesi berilgen, dep habarlaıdy Almaty-akshamy.kz QazAqparatqa silteme jasap.
Qujattyń tolyq ataýy – «Memleket basshysynyń 2022 jylǵy 16 naýryzdaǵy Joldaýyn iske asyrý máseleleri boıynsha Qazaqstan Respýblıkasynyń keıbir Konstıtýsıalyq zańdaryna ózgerister men tolyqtyrýlar engizý týraly» zań jobasy. 28 shildege deıin qoǵam talqysynda bolatyn qujattyń jobasyna súıensek, «Qazaqstan Respýblıkasyndaǵy saılaý týraly» Qazaqstan Respýblıkasynyń 1995 jylǵy 28 qyrkúıektegi № 2464 Konstıtýsıalyq zańynyń ondaǵan babyna 100-ge jýyq ózgeris pen túzetý usynylǵan. Sonyń ishinde Ortalyq saılaý komısıasynyń ókileti men mindetine qatysty birqatar ózgertýler bar.
Naqtyraq aıtsaq, saılaýǵa baqylaý júrgizetin qoǵamdyq birlestikter men komersıalyq emes uıymdardy akredıtteý ókileti berilmek.
«16-10) jarǵylyq qyzmetine saılaýdy baıqaý jónindegi qyzmetti júzege asyrý jatatyn qoǵamdyq birlestikter men komersıalyq emes uıymdardy akredıtteý tártibin ázirleıdi jáne bekitedi;
16-11) jarǵylyq qyzmetine saılaýdy baıqaý jónindegi qyzmetti júzege asyrý jatatyn respýblıkalyq qoǵamdyq birlestikter men komersıalyq emes uıymdardy akredıtteýdi júzege asyrady;
16-12) saılaýdy, referendýmdy ázirleý men ótkizý kezeńinde saılaý komısıalaryn uıymdastyrý men olardyń qyzmeti úshin qajetti taýarlardy, jumystar men kórsetiletin qyzmetterdi satyp alý qaǵıdalaryn jáne bekitedi;
16-13) aýmaqtyq saılaý komısıalarynyń kandıdattaryna qoıylatyn biliktilik talaptaryn ázirleıdi jáne bekitedi», - dep jazylǵan usynylyp otyrǵan zań jobasynda.
Qoldanystaǵy "Saılaý týraly" zańnyń 12-babynda mundaı norma joq.