Dúnıejúzilik densaýlyq saqtaý uıymynyń (DDSU) mamandary A(H3N2) tumaý vırýsynyń, ıaǵnı Gonkong tumaýynyń álemde jyldam taralyp jatqanyn málimdedi, - dep habarlaıdy Aqshamnews.kz.
Qazirgi tańda vırýs 30-dan astam elde tirkelgen. Bul týraly uıymnyń epıdemıalyq jáne pandemıalyq qaterlerdi basqarý departamentindegi jahandyq respıratorlyq qaýipter bóliminiń basshysy Vensın Chjan habarlady.
Soltústik jartysharda qys mezgiliniń bastalýymen tumaý jáne basqa da tynys joldary vırýstaryna shaldyǵý derekteri kóbeıip otyr. Alaıda mamandardyń aıtýynsha, álemdik deńgeıdegi tumaý juqtyrý kórsetkishi ázirge boljamnan asa qoıǵan joq.
Sonymen birge DDSU A(H3N2) vırýsynyń J.2.4.1 dep atalatyn jańa qosalqy túriniń paıda bolyp, tez taralýyna erekshe nazar aýdaryp otyr.
Vensın Chjannyń aıtýynsha, bul vırýs alǵash ret tamyz aıynda Aýstralıa men Jańa Zelandıada anyqtalǵan. Keıinnen ol Ońtústik Amerıkadan basqa álemniń barlyq óńirlerindegi 30-dan astam elde tirkelgen.
DDSU ókiliniń málimetinshe, qazirgi epıdemıologıalyq derekter aýrýdyń aýyr ótý jaǵdaılarynyń artqanyn kórsetpeıdi. Alǵashqy zertteýler qoldanystaǵy maýsymdyq tumaýǵa qarsy vaksınalardyń jańa vırýsqa qarsy tıimdiligin saqtap otyrǵanyn, ıaǵnı aýyr asqynýlardyń aldyn alyp, aýrýhanaǵa jatqyzý qaýpin azaıtatynyn kórsetken.
Sonymen qatar tumaýmen birge respıratorlyq-sınsıtıaldyq vırýs, koronavırýs jáne rınovırýstar sıaqty basqa da tynys joly ınfeksıalary aınalymda júr.
Osy jaǵdaıǵa baılanysty birqatar elderde densaýlyq saqtaý júıesine qosymsha salmaq túsip otyr. Bul tek tynys joly aýrýlarymen aýrýhanaǵa jatqyzylǵandar sanynyń artýymen ǵana emes, sonymen qatar basqa maýsymdyq vırýstyq ınfeksıalardyń kóbeıýimen de baılanysty.