Úı-jaılarda maska taǵý mindetti emes.
Búgin Premer-Mınıstrdiń orynbasary Eraly Toǵjanovtyń tóraǵalyǵymen Qazaqstan aýmaǵynda koronavırýs ınfeksıasynyń taralýynyń aldyn alý jónindegi vedomstvoaralyq komısıanyń otyrysy ótti, dep habarlaıdy Almaty-akshamy.kz Primeminister.kz saıtyna silteme jasap.
Komısıa jumysyna memlekettik organdardyń, «Atameken» UKP ókilderi jáne óńirlerdiń basshylary qatysty.
Eldegi epıdemıologıalyq jaǵdaıdyń turaqtanýyn eskere otyryp, vedomstvoaralyq komısıa kelesideı sheshimder qabyldady:
- úı-jaılarda mindetti maska taǵý talabyn alyp tastaý;
- medısınalyq mekemelerde (personal, qyzmetkerler, pasıentter, kelýshiler) medısınalyq maskalardy taǵý mindetin óz kúshinde qaldyrý;
- adam kóp jınalatyn oryndarda, qoǵamdyq kólikte, uıymdasqan ujymdarda maska taǵýdy usynymdyq sıpatta qaldyrý;
- bilim berý uıymdarynda oqytýdyń kabınettik júıesine ruqsat berý.
Sondaı-aq komısıa sheshimimen Pfizer preparatymen vaksınalaýǵa jatatyn tulǵalar kontıngenti keńeıtiledi, ol mynadaı sanattarmen tolyqtyrylady:
- bastapqy vaksınalaýdan ótetin, profılaktıkalyq vaksına alǵysy keletin adamdar;
- túrli sebeptermen shetelge shyǵý úshin qaıtalama ekpe alýshylar;
- shetelde alǵan vaksına kýrsyn aıaqtaý úshin ekpe alýshy tulǵalar;
- COVID-19 vırýsyna qarsy revaksınasıa alýshy barlyq toptaǵy adamdar.
Otyrys sońynda Eraly Toǵjanov qolaıly epıdemıologıalyq jaǵdaıdy qamtamasyz etýdiń basty sharttarynyń biri azamattardy ýaqytyly ımmýndaý jáne revaksınalaý ekenin atap ótti. Ol ákimdikterge koronavırýs ınfeksıasyna qarsy egý naýqanyn erekshe baqylaýǵa alýdy tapsyrdy jáne halyq arasynda sapaly túsindirý jumystaryn júrgizý qajettigin atap ótti.