Qurylys quny – 1,3 mlrd teńge.
Almatyda krematorııdiń qurylysy aıaqtaldy. Bul týraly qalalyq ákimdiktiń baspasóz qyzmetinen málim etti, dep habarlaıdy Almaty-akshamy.kz QazAqparatqa silteme jasap.
«Krematorııdiń qurylys jumystary 2021 jyldyń jeltoqsanynda aıaqtaldy. Búgingi tańda syrtqy ınjenerlik jelilerdi, onyń ishinde ornatylǵan peshterdi paıdalaný úshin gazben jabdyqtaý jelisin tartý jumystary júrgizilýde. Krematorııdi 2022 jyldyń mamyrynda qosý josparda», - dep jaýap berdi qala ákimdiginen.
Kelisimshartqa sáıkes, krematorıı Almaty qalasy, Alataý aýdany Aqyn Sara kóshesiniń soltústik bóliginde, JEO-2 shyǵysyna qaraı ornalasqan patologoanatomıalyq búro janynan (syrtqy ınjenerlik jelilersiz) salyndy.
Qazirgi ýaqytta Qazaqstanda krematorııdiń jumys isteý qaǵıdalary, sondaı-aq máıtti kremasıaǵa qabyldaý erejeleri ázirlenýde.
Aıta keteıik, 2020 jyldyń jazynda krematorıı qurylysynyń jobalyq-smetalyq qujattaryn jasaýǵa tender jarıalanǵan bolatyn.
Tapsyrys berýshi – Almaty qalasy Jaıly qalalyq orta basqarmasy.