Búgin QR Premer-Mınıstriniń orynbasary Eraly Toǵjanovtyń tóraǵalyǵymen Qazaqstan Respýblıkasynyń aýmaǵynda koronavırýstyq ınfeksıanyń taralýyna jol bermeý jónindegi vedomstvoaralyq komısıanyń otyrysy ótti, dep habarlaıdy Almaty-akshamy.kz QazAqparatqa silteme jasap.
Kún tártibindegi negizgi másele - pandemıa kezeńinde bıznestiń qyzmetin qamtamasyz etý úshin shekteý sharalaryn qaıta qaraý týraly otandyq bıznes ókilderimen kezdesýde Memleket basshysynyń bergen tapsyrmasyn oryndaý boıynsha sharalardy ázirleý boldy. Talqylaý qorytyndysy boıynsha VAK Densaýlyq saqtaý mınıstrligi usynǵan bıznes sýbektileri qyzmetiniń shekteýlerin azaıtý jónindegi sharalardy qoldady.
Atap aıtqanda, qyzmetkerler men kelýshilerdiń «jasyl» mártebesi boıynsha jumys isteıtin obektiler úshin epıdemıologıalyq táýekeldiń barlyq aımaqtarynda (jasyl, sary, qyzyl) karantındik shekteýlerdi jeńildetý týraly sheshim qabyldandy. Sondaı-aq, «kók» mártebesi bar kelýshiler úshin jumys isteıtin bıznes obektileri úshin epıdemıologıalyq qater aımaǵyna baılanysty karantındik shekteýlerdi álsiretý máselesi qaraldy. Jasyl aımaqta-shekteýsiz, sary, qyzyl aımaqtarda karantındik shekteýlerdi tolymdylyqty arttyrý boıynsha jeńildetý jáne jumys rejımi boıynsha shekteýlerdi alyp tastaý baǵyttary qaraldy. Vıse-premer karantındik shekteýlerdi alyp tastaý kásipkerler tarapynan sanıtarıalyq talaptardy múltiksiz saqtaýdy qamtamasyz etý boıynsha jaýapty qadamdardy talap etetinin atap ótti.
Premer-Mınıstrdiń orynbasary COVID-19 ınfeksıasynyń óte juqpaly nusqasy bolyp tabylatyn «omıkron» shtamynyń tez taralýyna baılanysty qazirgi qıyn jaǵdaıda VAK epıdemıologıalyq jaǵdaıdy túzetý úshin barlyq resýrstardy jumyldyrýdy usynǵanyn jáne basty basymdyq halyqty vaksınasıalaý jáne revaksınalaý ekenin atap ótti.
Keńes sońynda Eraly Toǵjanov ákimdikterge vaksınalaý qarqynyn kúsheıtýdi tapsyrdy, ol úshin vaksınalardyń jetkilikti sanyn bóldi. Sonymen qatar, jergilikti jerlerde Úkimet qabyldaıtyn is-sharalardyń oryndalýyn baqylaýǵa erekshe nazar aýdarý qajettigin atap ótti.