Oqý-jattyǵýdy úılestirý jónindegi respýblıkalyq shtab Shyǵys Qazaqstan oblysynyń Óskemen qalasynda ornalasqan.
Oqý-jattyǵýdyń ekinshi kúni joıqyn jer silkinisiniń saldaryn joıý kezinde avarıalyq-qutqarý quralymdarynyń praktıkalyq is-qımyldaryn pysyqtaý jalǵastyryldy, dep habarlaıdy Almaty-akshamy.kz Tótenshe jaǵdaılar mınıstrligine silteme jasap.
Osyndaı is-sharalar elimizdiń barlyq seısmıkalyq qaýipti óńirlerinde Almaty, Shymkent qalalarynda, Abaı, Jetisý, Almaty, Shyǵys Qazaqstan, Jambyl, Qyzylorda jáne Túrkistan oblystarynda ótkizildi. Qalǵan óńirlerde apat aımaqtaryna kúshter men quraldardy jiberý uıymdastyryldy.
Oqý-jattyǵý elimizdiń seısmıkalyq qaýipti óńirlerinde turatyn halyqty jer silkinisi men basqa da tótenshe jaǵdaılar týyndaǵan kezdegi is-qımyldarǵa jappaı úgit-nasıhat júrgizýge jáne oqytýǵa baǵyttalǵan biryńǵaı keshendi mindet formatynda ótti.
Halyqty jer silkinisi kezindegi is-qımyldarǵa oqytý maqsatynda «jer silkinisi kezindegi 10 qadam» jáne «dabyl chemodanyn jasaqtaý» jadynamalaryn tarata otyryp, jalpy sany 300 myń adamdy qamtıtyn 5 myńǵa jýyq kópqabatty turǵyn úı men 23 myń jeke turǵyn úıdi aralaý júrgizildi. Zardap shekken halyqty qabyldaý pýnktterin ornalastyrý týraly aqparaty bar 24 myńnan astam dana QR kodtary ornatyldy.
Oqý-jattyǵý barysynda memlekettik organdar arasyndaǵy ózara is-qımyldy uıymdastyrý, halyqty habardar etý, evakýasıalaý, zardap shekken halyqty ornalastyrý, medısınalyq jáne psıhologıalyq kómek kórsetý, oqý-jattyǵý josparyna sáıkes turaqty ornalasqan pýnktterden jıyntyq toptardy qalyptastyrý, tasymaldaý jáne tótenshe jaǵdaı aımaǵyna kóshirý, qutqarý quralymdarynyń kúshteri men quraldaryn basqarý, sondaı-aq volonterlik jáne úkimettik emes uıymdarmen jumys máseleleri pysyqtaldy.
Barlyq múddeli qyzmetter men uıymdardy tarta otyryp, 203 taktıkalyq-arnaıy oqý-jattyǵý ótkizildi, oǵan 5 myń adam jáne 1 myń birlik tehnıka, onyń ishinde áýe kemeleri tartyldy. Zardap shekken halyqqa arnalǵan 20 lager, 10 jyljymaly gospıtál, sondaı-aq 10 dalalyq basqarý pýnkti ashyldy.