Úkimet jospary aıtyldy.
Qazaqstan Úkimetiniń jastardy jumysqa yntalandyrý maqsatynda jasalyp jatqan jumystar jaıynda Eńbek jáne halyqty áleýmettik qorǵaý vıse-mınıstri Erjan Birjanov Ortalyq komýnıkasıalar qyzmetinde ótken baspasóz máslıhaty barysynda aıtty, dep habarlaıdy Almaty-akshamy.kz.
«Jastardy jumysqa tartý jáne yntalandyrý úshin eńbek zańnamasyna «jas qyzmetker» uǵymyn engizý, olar úshin synaq merzimin alyp tastaý, basqa óńirlerden jumysqa kelgen jastar úshin turǵyn úı jaldaýǵa kóterme járdemaqy engizý jóninde sharalar qabyldanatyn bolady», - delingen Eńbekmıni baspasóz qyzmetiniń habarlamasynda.
Mamandardyń aıtýynsha, kóp balaly otbasylar (76,8 myń) jáne múgedektigi bar balalardy tárbıelep otyrǵan otbasylar (7 myń) úshin barlyq óńirlerde qoldanystaǵy úlgidegi áıelderdi qoldaý ortalyqtaryn qurý josparlanýda. Bul ortalyqtarda jyl saıyn 20 myńǵa jýyq áıelge keshendi qoldaý kórsetiletin bolady.
Joǵaryda kórsetilgen sharalar naqty qajettilikter boıynsha áleýmettik qoldaýǵa muqtaj azamattardy anyqtaýǵa, jastardyń jumyspen qamtylýyn qamtamasyz etýge, balaly otbasylarǵa kómek kórsetýge múmkindik beredi.
Eńbek naryǵyna taldaý júrgizildi jáne nazar aýdarýdy talap etetin negizgi aspektiler aıqyndaldy, atap aıtqanda, jumyspen qamtylǵandardyń 15,2%-y tek orta bilimge ıe, túlekterdiń 40%-dan astamy mamandyq boıynsha jumys istemeıdi, jastardyń 34,1%-y mamandyqty óz betinshe tańdamady. Sarapshylardyń boljamy boıynsha, aldaǵy 5 jylda qyzmetkerlerdiń daǵdylary men talaptardyń 40%-ǵa jýyǵy ózgeredi.
Osy máselelerdi sheshý úshin mynadaı sharalar josparlanyp otyr:
- bıznespen birlesip, kásiporyndar janyndaǵy oqý ortalyqtary bazasynda jappaı qaıta daıarlaýdyń, biliktilikti arttyrýdyń «fabrıkalaryn» qurý qajet. Jastardy suranysqa ıe mamandyqtarǵa oqytýǵa erekshe nazar aýdarý josparlanýda;
- suranysqa ıe daǵdylardy taný júıesin engizý. Memleket basshysynyń tapsyrmasy boıynsha Eńbekmıni «Kásiptik biliktilik týraly» zań jobasyn ázirledi. Onyń sheńberinde biliktilikti tanýdyń táýelsiz ortalyqtaryn qurý úshin tıimdi jaǵdaılar jasaý, jyl saıynǵy sertıfıkattaýdan ótý úshin izdenýshilerge keminde 1000 vaýcher usyný kózdeledi. Iaǵnı, bir rettik vaýcher negizinde jumyssyzdar keıinnen jumysqa ornalasý úshin óz biliktiligin rastaı alady;
- skills.enbek.kz platformasy arqyly jańa bilim men daǵdylardy ıgerý úshin jaǵdaı jasaý. Portal 2021 jyly jalpy el halqynyń bilim deńgeıi men kásibıligin arttyrý, mansaptyq damýdy yntalandyrý jáne «Ómir boıy oqytý» tujyrymdamasyn ilgeriletý maqsatynda iske qosyldy. Bul - Coursera sıaqty halyqaralyq onlaın oqytý platformalarynyń analogy;
- oqýshylar men jastar arasynda kásiptik baǵdarlaýdy uıymdastyrý úshin mansaptyq ilgerileý boıynsha keminde 100 nusqaýlyq ázirleý. Suranysqa ıe kásipter men perspektıvaly daǵdylardyń tizimi jyl saıyn jańartylyp otyrady.
Bul sharalar jumys berýshilerdiń suranysy boıynsha kadrlar daıarlaýǵa, jastardy eńbek naryǵynda suranysqa ıe mamandyqtar men daǵdylar týraly habardar etýge, olarǵa mamandyq tańdaýda qoldaý kórsetýge múmkindik beredi.
Vıse-mınıstr sondaı-aq, aǵymdaǵy jyldan bastap memlekettik josparlaýdyń jańa júıesine sáıkes ekonomıkanyń basym salalary boıynsha ulttyq jobalardy iske asyrý bastalǵanyn, olardyń negizgi mindeti jumys oryndaryn qurý bolyp tabylatynyn atap ótti.
«Óńirlerdiń orta merzimdi kezeńge arnalǵan damý perspektıvalarymen jumys oryndaryn qurý boıynsha mindetterdi biriktirýdi qamtamasyz etetin keshendi qujattar bolyp tabylatyn óńirlik jumyspen qamtý kartalary qalyptastyryldy. Jalpy, 2025 jylǵa deıin 2 mln-nan astam, onyń ishinde 600 myńnan astam turaqty jáne 1,4 mln-nan astam ýaqytsha jumys oryndary qurylatyn bolady. Barlyq qurylǵan jumys oryndary «Jumys oryndaryn qurýdyń ıntegrasıalanǵan kartasy» aqparattyq júıesinde vızýaldanatyn bolady. Jergilikti atqarýshy organdardyń aldyna júıeni sapaly toltyrý mindeti qoıyldy.Eki aıdyń qorytyndysy boıynsha shamamen 65 myń jumys orny nemese jyldyq jospardyń 15% (444,4 myń) quryldy, onyń ishinde 16 myńnan astamy turaqty», – dep habarlady Erjan Birjanov.
Óz sóziniń sońynda ol, Eńbekmıni jańa trendterge sáıkes, halyqty jumyspen qamtý salasyn sıfrlandyrý boıynsha júıeli jumys júrgizip jatqanyn atap ótti.
«Negizgi maqsat – bıznes-úderisterdi tolyǵymen qaıta qaraý, proaktıvti formatqa kóshýdi júzege asyrý. Ol úshin biz biryńǵaı sıfrlyq ekojúıeni quratyn bolamyz, oǵan mynadaı servıster kiredi: Elektrondyq eńbek bırjasy – enbek.kz, qysqa merzimdi onlaın kýrstar portaly – skills.enbek.kz, frılanserler úshin jumys izdeý qyzmeti – freelance.enbek.kz, eńbek sharttaryn esepke alýdyń elektrondyq júıesi – ehr24.kz, kásipkerlikti damytý sharalaryn kórsetý jónindegi avtomattandyrylǵan júıe – business.enbek.kz. Bul servısterdi Eńbekmıni «Eńbek resýrstaryn damytý ortalyǵy» AQ mamandarymen birlesip derbes ázirleıdi», – dep qorytyndylady Erjan Birjanov.