Ǵylym salasyn búdjetten qarjylandyrý sońǵy eki jylda 2 esege jýyq ósti
2018 jyly ǵalymdar sany 8 myńnan astam bolsa, 2021 jyldyń qorytyndysy boıynsha ǵylym salasynda 9 200 jas qyzmetker eńbek etedi, dep habarlaıdy Almaty-akshamy.kz
«Jastardyń ǵylym salasyna kelýi olardy qyzyqtyratyn jaǵdaı jasalyp jatqanyn bildiredi. Jas zertteýshilerdi qoldaý úshin memleket qabyldaǵan sharalardyń arqasynda ǵalymdar sany artty. Ǵylym salasyn búdjetten qarjylandyrý sońǵy eki jylda 2 esege jýyq ósti. Ǵylymı jobalardy granttyq qarjylandyrý merzimi 5 jylǵa deıin uzartyldy. Eger buryn granttar konkýrsy 3-5 jylda bir ret ótkiziletin bolsa, qazir olar jyl saıyn ótkiziledi. Esep berý azaıdy, búrokratıalyq kedergiler joıyldy. Jas ǵalymdar úshin jeke granttar qarastyrylǵan. Magıstranttar men doktoranttardyń stıpendıalary aıtarlyqtaı ósti. Jas zertteýshilerge arnaıy syılyqtar taǵaıyndaldy. Memleket basshysynyń tapsyrmasy boıynsha qazaqstandyq ǵalymdarǵa álemniń jetekshi ǵylymı ortalyqtarynda taǵylymdamadan ótý múmkindigi berildi. Osylaısha, jas ǵalymdardyń ǵylymı ıdeıalary men áleýetin júzege asyrý úshin barlyq jaǵdaı jasalyp jatyr», – dep atap ótti QR BǴM Ǵylym komıtetiniń tóraǵasy Janna Qurmanǵalıeva.
Bıologıalyq qaýipsizdik problemalary ǵylymı-zertteý ınstıtýtynyń (BQPǴZI) ǵylymı qyzmetkeri Rýslan Ábitaev – otandyq «QazVac» vaksınasyn ázirleýge qatysqan jas ǵalymdardyń biri. Ol baqylaý, bıologıalyq tehnologıalar zerthanasynda jumys isteıdi jáne vaksınalardyń qaýipsizdigi men ımmýnogendiligin tekseredi. Rýslan 28 jasta jáne ol jas ǵalymdarǵa memleket tarapynan kórsetiletin qoldaýdyń aıtarlyqtaı artqanyn atap ótti.
«Anam – muǵalim, mektepte bıologıadan sabaq beredi. Ol árdaıym ǵylym týraly qyzyǵýshylyqpen aıtatyn, meni zerthanaǵa ertip aparyp, mıkroskoptardy kórsetti. Bul baǵyt maǵan óte qyzyq boldy. 9-synypta bıologıalyq qaýipsizdik máseleleri ınstıtýty týraly estidim. Sol kezde men ǵylymmen aınalysyp, BQPǴZI-da jumys isteıtin bolamyn dep sheshtim. QazUÝ-da oqyp júrgen kezimde jyl saıyn ınstıtýtta zertteý tájirıbesinen óttim, al JOO-ny bitirgennen keıin meni osynda jumysqa qabyldady. Men jas ǵalym retinde memleket tarapynan úlken qoldaýdy sezinemin. Bes jyl buryn qyzmet jolyn BQPǴZI-da zerthanashy retinde bastaǵan edim, qazir ǵylymı qyzmetkermin, osy ýaqyt ishinde jalaqym aıtarlyqtaı ósti. Halyqaralyq standarttarǵa sáıkes zamanaýı jabdyqtarmen jabdyqtalǵan bıofarmasevtıkalyq zaýyt salynǵanyn bilesizder. Sonymen qatar ınstıtýttyń jas qyzmetkeri retinde men jańa úsh bólmeli páterdiń kiltin aldym. Bizdiń elimizde ǵylymı qyzmetpen aınalysý úshin óte jaqsy jaǵdaılar jasalyp jatyr, sondyqtan da qazir bizdiń qatarymyzdyń aıtarlyqtaı kóbeıip jatqanyna qýanyshtymyn», – dep atap ótti ǵalym Rýslan Ábitaev.