Qazaqstanda elektrondyq sıfrlyq qoltańba (ESQ) kiltterin qaıta shyǵarý tártibi kúsheıtildi. Endi bul proses kezinde azamattyń jeke basyn mindetti túrde qosymsha rastaý talap etiledi, dep habarlaıdy Aqshamnews.kz tilshisi.
«Ulttyq aqparattyq tehnologıalar» AQ málimetinshe, jańa talap azamattardyń jeke derekterin qorǵaý jáne alaıaqtyq áreketterdiń aldyn alý maqsatynda engizilgen. Qosymsha qorǵanys tetigi ruqsatsyz qol jetkizý qaýpin tómendetýge baǵyttalǵan.
Endi pki.gov.kz portalyndaǵy jeke kabınet arqyly ESQ kiltterin qaıta shyǵarý kezinde júıe paıdalanýshydan jeke basyn eki tásildiń birimen rastaýdy suraıdy. Atap aıtqanda, bir rettik SMS-kod Mobıldi azamattar bazasynda tirkelgen telefon nómirine jiberiledi nemese eGov Mobile qosymshasynda kórsetiletin sıfrlyq kod engizilýi qajet. Bul tetik ESQ kiltterin ıesiniń smartfonyna qol jetkizýsiz zańsyz paıdalanýdan qorǵaýǵa múmkindik beredi.
Jańa talaptar ázirge sheteldik azamattarǵa qoldanylmaıdy. Sebebi olardyń telefon nómirleri kóp jaǵdaıda Mobıldi azamattar bazasyna tirkelmegen.
Aıta keteıik, buǵan deıin alaıaqtar aldaý jolymen paıdalanýshylardyń jeke kabınetterine kirip, ESQ kiltterin óz tasymaldaǵyshtaryna qaıta shyǵarý faktileri tirkelgen bolatyn. Budan bólek, úshinshi tulǵanyń ESQ-syn paıdalanǵan qazaqstandyqtarǵa aıyppul salynatyny týraly da habarlanǵan edi.