Qazaqstanda esirtki zerthanalary sanynyń ósýi baıqalady.
Osy jyldyń jeti aıynda polısıa tek sıntetıkalyq esirtki óndirýdi jolǵa qoıǵan 24 jasyryn esirtki zerthanasy joıylǵan, – dep habarlaıdy aqshamnews.kz Polisia.kz-ke silteme jasap.
Almatyda osyndaı 11 fakt anyqtalǵan. Ekinshi oryndy Almaty oblysy ıelengen. Bul óńirden polıseıler jeti zańsyz sıntetıkalyq esirtki óndirisin joıypty. Esirtki óndirýshilerden 200 kg-nan astam “sıntetıka” jáne eki tonnadan astam prekýrsor tárkilengen.
Sońǵy eki aptada Almatyda eki esirtki zerthanasy joıylǵan. Shilde aıynyń sońynda úsh astanalyq turǵyn ustalypty. Olar 800 myń teńgege úı jaldap, onda mefedron óndirisin uıymdastyrǵan. Olar barlyq jabdyqtar men hımıalyq zattarǵa qashyqtan tapsyrys berip otyrǵan. Kúdiktilerden 20 kg daıyn esirtki, 250 lıtr prekýrsor men hımıalyq jabdyqtar tárkilengen. Araǵa on kún salyp, polıseıler esirtki saqtady degen kúdikpen 23 jastaǵy almatylyq turǵyndy ustady. Ol turyp jatqan úıdiń tóbesin tintý kezinde mefedron, prekýrsor, tynys alý maskasy, esirtki sıntezine arnalǵan jabdyq tárkilengen. Qaskóıdiń “vırtýaldy” kýratorlary daıyn esirtkiniń kılogramy úshin 1,5 mln teńge tóleýge ýáde bergen kórinedi. Esirtki óndirisi úshin bul jigittiń 15 jylǵa jýyq merzimge bas bostandyǵynan aıyrylatyny anyq.
Búginde esirtki óndirisinde qoldanylatyn hımıalyq jabdyqtardyń aınalymy úshin qylmystyq jaýapkershilik engizilgen. Qazirgi ýaqytta Parlament Májilisinde esirtki óndirgeni úshin jazany ómir boıyna bas bostandyǵynan aıyrýǵa deıin qatańdatatyn zań jobasy qaralýda. Bul bastamalardy qoǵam qoldaıdy. Sonymen qatar esirtkini taratqany úshin jaza merzimderin qysqartyp, olardy óndirgeni úshin jaýapkershilikti kúsheıtý boıynsha azamattar qurǵan eki petısıa qaraýǵa alyndy.