Qazaqstanda tanymal bloger Mellstroy-ǵa qatysty izdeý jarıalandy. Bul aqparat Qarjy monıtorıńi agenttigi qozǵaǵan izdeý isi boıynsha Bas prokýratýranyń quqyqtyq statısıka jáne arnaıy esepke alý portalynda jarıa boldy, dep habarlaıdy Aqshamnews.kz.
Sot blogerge qatysty «qamaýda ustaý» túrindegi bultartpaý sharasyn sanksıalaǵan.
Agenttik Mellstroy-dyń Qazaqstan aýmaǵyndaǵy ınternet paıdalanýshylaryn da nysanaǵa alǵan zańsyz onlaın-kazıno — “Mellstroy.game” platformasyn jarnamalaǵany úshin kúdikke ilingenin atap ótti.
Bloger áleýmettik jelilerde keń aýqymdy jarnamalyq kampanıa uıymdastyryp, túrli utys oıyndary men chellendjder jarıalaǵan. Qatysýshylarǵa TikTok, YouTube Shorts jáne basqa da platformalarda kazıno ataýyn, logotıpterin jáne saıt siltemelerin kórsetetin vıdeolar túsirý usynylǵan.
Resmı málimetterge sáıkes, Mellstroy buǵan deıin Reseıde tikeleı efır kezinde adamdy uryp-soqqany úshin jaýapkershilikke tartylǵan. Al 2025 jyldyń qarashasynda Mınsk qalalyq soty onyń barlyq kanaldary men logotıpterin ekstremıstik materıal dep tanyǵan.
Mellstroy degen kim?
Mellstroy atymen tanylǵan Andreı Býrım – Belarýsten shyqqan strımer, bloger jáne ınflúenser. Ol orys tildi jeli qoldanýshylary arasynda «trash-strımıng» janry arqyly keńinen tanyldy. Bul baǵyttaǵy kontent ádette arandatýshylyqqa, shok týǵyzatyn áreketterge jáne orynsyz qylyqtarǵa negizdeledi.
Andreı Býrım strımerlik mansabyn 2017 jyly Twitch pen YouTube platformalarynda oıyn translásıalarynan bastaǵan. Keıinnen ol alkogól, túngi saýyq keshteri, donat-chellendjder men túrli utys oıyndaryna qurylǵan «laıv-shoýlarǵa» aýysty. Onyń aýdıtorıasy negizinen TMD elderiniń jastary, al Instagram, Twitch jáne YouTube-ta mıllıondaǵan jazylýshysy bar.