Qazaqstannyń halyq ártisi Maqpal Júnisova áleýmettik jelidegi paraqshasynda vıdeo jarıalap, prodúser Baıan Alagózovaǵa arnaıy ótinish jasady, dep habarlaıdy Aqshamnews.kz tilshisi.
Óner juldyzy marqum kompozıtor Arman Dúısenovtyń jubaıy Aısulýdyń qıyn jaǵdaıǵa tap bolǵany týraly aıtylǵan vıdeolardyń kópshilikke aýyr tıip jatqanyn jetkizdi.
«Aısulý hanym úıim joq, dalada qaldym dep aıtyp jatyr. Ol bárimizdiń júregimizge batady. Qolymnan kelse ózim-aq alyp berer edim, biraq mıllıonerdiń áıeli emespin, artyq aqsham joq. Sol úshin ákimdiktiń jigitterine habarlasyp, qandaı kómek berýge bolatynyn suradym. Biraq ákimdik balansynda úı joq ekenin bildim. «Úı bere qoıýy qıyn» degendi de estidim», – dedi Maqpal Júnisova.
Ánshi osy rette birden senim artatyn jalǵyz adamnyń Baıan Maqsatqyzy ekenin atap ótti.
«Arman Dúısenov Baıandy qatty syılaıtyn. Qashan kórseń, joǵary baǵalap otyratyn. Onyń kóp jobasynda eńbek etti, “Keshúdiń” ánderin jazdy. “Dosym” dep aıtatyn. Sol úshin osy máseleni Baıan ǵana túsinedi dep oılaımyn. Joldasy ekeýi aqyldasyp, bir sheshim qabyldar degen úmittemin. Baıanjan, qoldan kelse birdeńe qylyp bir úı alyp berseńder abyroılaryńyz odan saıyn ósedi. Jarty aqshasyn ózimiz jınaýǵa tyrysarmyz. Eki toıǵa baryp, túsetin qarajatty kómegim retinde bereıin», - dedi halyq ártisi.
Ol sonymen birge «halyqtan aqsha jınaý uıat bolar» dep, bul istiń qaıyrymdylyq emes, dostyq pen syılastyq deńgeıinde sheshilgenin qalaıtynyn aıtty.
Aıta keteıik, 2023 jyly 24 qańtarda Qazaqstannyń eńbek sińirgen qaıratkeri, kompozıtor, prodúser ári telejúrgizýshi Arman Dúısenov ómirden ótken edi.