Bıylǵy qazannyń qorytyndysy boıynsha, Qazaqstanda taýarlar men qyzmetterdiń baǵasy 12,6 paıyz ósti. Buǵan baılanysty jyljymaıtyn múlik naryǵynda da qymbattaǵan, - dep habarlaıdy aqshamnews.kz tilshisi.
Ranking málimetinshe, qazanda jańa turǵyn úılerdiń baǵasy 13,1 paıyz, al qaıtalama naryqtaǵy baspana quny 11,6 paıyz ósken.
Qazaqstanda baspana nege qymbattap jatyr?
Basylym tórt negizgi sebepti ataǵan.
QQS ósimi jáne naryqtaǵy ózgeris
QQS mólsherlemesiniń 16 paıyzǵa deıin artýy baǵa qalyptastyrýdaǵy basty faktorlardyń biri boldy.
"Qurylys salýshylar sharshy metrdiń baǵasyna aldyn ala salyqtardy qosa bastady", - dep jazdy basylym.
Sonyń áserinen satyp alýshylar baǵanyń ósýin boljap, suranys artty. Al ekinshi naryqtaǵy satýshylar da jańa úılerdiń qymbattaýyna qarap, óz baǵalaryn kótere bastady.
Qosymsha áser etetin taǵy bir jaıt — qurylys kompanıalary úshin QQS boıynsha jeńildiktiń 2026 jyldyń 1 qańtarynan bastap kúshin joıýy.
Turǵyn úı qurylysyna úlestik qatysý erejeleriniń qatańdaýy
Bıyl úlestik qatysý týraly zańǵa úsh paket ózgeris engizilgen. Eń mańyzdysy - ekinshi paket. Ózgeristerge sáıkes:
- úleskerlermen mámileler tek úlestik qatysý týraly kelisim boıynsha ǵana jasalýy kerek;
- turǵyn úı keshenderin jarnamalaý tek garantıa nemese ruqsat bolǵanda ǵana ruqsat etiledi;
- ákimdikter men ınjınırıńtik kompanıalar tarapynan baqylaý kúsheıtiledi.
Bul ózgerister qurylysshylardyń múmkindikterin shektep, jobalardyń azaıýyna alyp keledi, nátıjesinde usynys kólemi tómendeıdi.
Suranystyń ózgerýi
Basylymnyń jazýynsha, Qazaqstandaǵy turǵyn úı naryǵy maýsymdy suranysqa táýeldi. Jaz ben kúzdiń basynda satyp alý belsendiligi artady, sebebi adamdar jyldyń aıaǵyna deıin mámilelerin aıaqtap alýǵa tyrysady. Osy kezeńde qurylysshylar da jańa jobalardy kóbirek iske qosady. Bul tabıǵı suranystyń artýyna jáne baǵanyń ósýine yqpal etedi.
Dollar baǵamynyń áseri
Valúta naryǵyndaǵy qubylý da baǵaǵa tikeleı áser etedi. Dollardyń kúsheıýi ımporttyq qurylys materıaldary men jabdyqtardyń qymbattaýyna alyp keledi, al bul qurylys qunynyń ósýine sebep bolady.
Ekinshi naryqtaǵy satýshylar da dollar baǵamyna qarap, óz esepterin soǵan sáıkestendirip, baǵany rettep otyrady.