Almaty onkologıalyq ortalyǵynda toq ishektiń asqynǵan qaterli isigine jáne aýyr júrek-qan tamyr aýrýyna shaldyqqan pasıentke kúrdeli ota sátti jasaldy.
76 jastaǵy naýqas ortalyqqa aýyr halde tústi. Dıagnozy - toq ishektiń joǵary bóliminiń İİİ satydaǵy qaterli isigi. İsik jińishke ishekke ótip, jylankóz túzip, aǵzanyń ýlanýyna jáne anemıanyń údeýine ákelgen. Gemoglobın deńgeıi - 69 g/l (áıelder úshin qalypty kórsetkish 120–150 g/l).
Basty qıyndyq - júrektegi aýyr patologıa: júrektiń ıshemıalyq aýrýy, 2022 jyly jasalǵan aortokoronarlyq shýnttaý jáne sol jaq qarynsha jumysynyń fraksıasy - nebári 28-30% (qalyptysy 55-70%).
"Biz qıyn tańdaý aldynda turdyq: ota jasalmasa, naýqas ómirmen qosh aıtysýy múmkin edi, al júrek jaǵdaıyna baılanysty kez kelgen hırýrgıalyq em-dom asa qaýipti boldy", - deıdi onkolog Asylbek Qarjaýov.
Hırýrgtar, kardıologtar jáne anestezıolog-reanımatologtar konsılıýmy ómirlik kórsetkishter boıynsha ota jasaý týraly sheshim qabyldady.
Naýqasty otaǵa daıyndaý barysynda onyń jaǵdaıyn turaqtandyrý, qan kólemin tolyqtyrý jáne anemıany túzetý sharalary júrgizildi. Anestezıologtar júrek rezerviniń tómendigin eskere otyryp, jeke anestezıalyq hattama jasady.
Ota – laparotomıa, keńeıtilgen oń jaqty gemıkolektomıa jáne jińishke ishektiń birneshe bóligine rezeksıa jasaý 55 mınýtqa sozyldy.
Zaqymdalǵan aımaqtar, onyń ishinde lımfa túıinderi alynyp, kózge kórinetin isik tinderi tolyq joıyldy.
"Zamanaýı qurylǵylarmen jabdyqtalǵan ota bólmeleri kúrdeli naýqastarda da joǵary dáldikpen jáne qan joǵaltýdy azaıta otyryp jumys isteýge múmkindik beredi. Bul álsiregen pasıentter úshin óte mańyzdy", - dedi Asylbek Qarjaýov.
Otadan keıin naýqas anestezıologıa jáne reanımasıa bólimine aýystyrylyp, táýlik boıy baqylaýǵa alyndy.
"Bizdiń mindetimiz naýqasty narkozdan jaıly shyǵýyn qamtamasyz etý, júrek pen ókpe qyzmetin qoldaý, tromboembolıalyq jáne ınfeksıalyq asqynýlardyń aldyn alý boldy. Jeke ınfýzıalyq, antıbakterıaldy jáne kardıotonıkalyq terapıa arqasynda jaǵdaı turaqtandy", - deıdi reanımasıa bóliminiń meńgerýshisi Ramıs Mýradov.
Otadan keıingi kelesi kúni naýqas belsendi qozǵala bastady, al eki kúnnen soń jalpy palataǵa aýystyryldy.
Segizinshi kúni ambýlatorıalyq em jalǵastyrý úshin úıine shyǵaryldy.
Bul jaǵdaı Almaty onkologıalyq ortalyǵynyń eń kúrdeli naýqastarmen de jumys isteı alatynyn aıqyn kórsetedi.
Mýltıdısıplınarlyq tásil, hırýrgtar men anestezıologtardyń tájirıbesi, zamanaýı medısınalyq jabdyq - munyń bári úmit úzilgen kezde de adam ómirin saqtap qalýǵa múmkindik beredi.