Ázirbaıjan prezıdenti Ilham Álıevtiń Qazaqstanǵa resmı sapary barysynda Memleket basshysy Qasym-Jomart Toqaev eki eldiń qarym-qatynasyn nyǵaıtýda mádenıet salasyndaǵy ózara is-qımyl erekshe ról atqaratynyn atap ótti.
Nátıjesinde ózara Mádenıet kúnderin ótkizý týraly kelisim jasaldy, dep habarlaıdy aqshamnews.kz
2024 jylǵy 24-26 qyrkúıek aralyǵynda Astanada Ázirbaıjan mádenı kúnderi ótedi. 24 qyrkúıekte «Fızýlı-530» kitabynyń tusaýkeseri jáne etno-djaz konserti ótedi. 25 qyrkúıekte Qazaqstan men Ázirbaıjannyń ulttyq kitaphanalary arasynda memorandýmǵa qol qoıý, Elmıra Ahýndova kitabynyń tusaýkeseri, sonymen qatar «Ázerbaıjan óneriniń jaýharlary» kórmesiniń ashylýy jáne bı ansambliniń konserti ótedi. 26 qyrkúıekte Ázirbaıjannyń zamanaýı óneri jáne Tomırıs ıkonografıasy týraly dárister ótkiziledi.
Basty is-shara 26 qyrkúıek kúni Q. Qýanyshbaev atyndaǵy Ulttyq mýzykalyq-drama teatrynda ótedi. Gala-konsertte Ázerbaıjannyń halyq ártisteri óner kórsetedi.
Aıta keteıik, 2023 jyldyń jeltoqsanynda Qazaqstan Respýblıkasynyń Ázerbaıjan Respýblıkasyndaǵy Mádenıet kúnderi Baký qalasynda ótti.