Keıingi jyldary elimizde ulttyq sport túrleri qarqyndy damyp keledi. Statısıkalyq málimetterge sáıkes, 2023 jyly ulttyq sport túrlerimen turaqty túrde shuǵyldanýshylar sany 619,2 myń adamdy qurasa, 2024 jyly bul kórsetkish 666,1 myń adamǵa jetken, dep habarlaıdy aqshamnews.kz
Dene shynyqtyrý jáne sportpen aınalysatyndardyń jalpy sanynyń 9,6%-y ulttyq sport túrlerimen shuǵyldanady. Búginde respýblıka boıynsha ulttyq sport túrlerinen 16 555 úıirme jumys isteıdi. Sonymen qatar kadr daıarlaý salasynda 15 balalar men jasóspirimder sport mektepteri jáne 17 sport klýby bar.
Ulttyq qurama komandalardy daıarlaýdy úılestirýdi Qazaqstan Respýblıkasy Týrızm jáne sport mınıstrligine qarasty Ulttyq jáne at sporty túrleri ortalyǵy júzege asyrady. Sonymen qatar dástúrli sport túrlerin nasıhattaýda Ulttyq sport qaýymdastyǵy mańyzdy róldi atqarady. Atalǵan uıymnyń quramynda 10 federasıa jumys isteıdi.
Atap aıtqanda, kókpar, jamby atý, aýdaryspaq, teńge ilý, báıge, sadaq atý, qusbegilik, toǵyzqumalaq, asyq atý, JORYQ at sporty. Odan bólek jappaı kókpar, qazaq kúresi jáne jekpe-jek federasıalary bar. Ulttyq sport túrleri el turǵyndary arasynda tanymal bolyp qala beredi. Olardyń ishinde strategıalyq oılaý qabiletin damytatyn toǵyzqumalaq, 159 myńnan astam adam jattyǵatyn qazaq kúresi jáne 78 myńnan astam qatysýshysy bar kókpar sporty erekshe mánge ıe.
Byltyr elordada kóshpendilerdiń Olımpıadasyna balanǵan 5-shi Dúnıejúzilik kóshpendiler oıyndary ótti. Uly dalany dúbirge bólegen jarysqa álemniń 90-ǵa jýyq memleketten 2500-den astam sportshy qatysyp, 21 sport túrinen 97 medal jıyntyǵyn sarapqa saldy. Bul mańyzdy oqıǵa etnomádenı qozǵalysqa, ulttyq sport túrlerin damytýǵa da tyń serpin berdi. Sondaı-aq elde jyl saıyn halyqaralyq týrnırlerden bastap aýyl chempıonattaryna deıingi 1000-nan astam jarys ótkiziledi.
Sondaı-aq ár tórt jyl saıyn Ulttyq sport túrleriniń festıvali men «Aqbıdaı» respýblıkalyq aýyl oıyndary sıaqty iri sporttyq is-sharalar uıymdastyrylady. Bul jarystar ulttyq sport túrlerine degen qyzyǵýshylyqty arttyryp, ári qaraı damýyna da yqpal etedi.