Bıyl balalarǵa 100 myńnan astam ota jasaldy
Búgin OKQ alańynda ótken brıfıń barysynda densaýlyq saqtaý vıse-mınıstri Vácheslav Dýdnık bizdiń elimizde 6,6 mıllıonnan astam bala memleket kepildik bergen eki paket jáne áleýmettik medısınalyq saqtandyrý aıasynda tegin medısınalyq kómek alatynyn atap ótti. 2022 jyly balalarǵa medısınalyq kómekti qarjylandyrýdyń jalpy somasy 560 mlrd teńgeni qurady, dep habarlaıdy Almaty-akshamy.kz.
Ol balalar jylynda ana men bala densaýlyǵyn saqtaý máselesi ózektilikke ıe bolyp, densaýlyq saqtaý júıesiniń mańyzdy jáne basym baǵyttarynyń biri bolyp qala beretinin atap ótti.
Búgingi tańda balalarǵa medısınalyq kómek kórsetýdiń kóp deńgeıli tásili júzege asyryldy. Ambýlatorıalyq kómekti 5690 MSAK obektisi kórsetedi. Stasıonarlyq kómek úshin 204 aýdandyq ortalyq aýrýhananyń, 10 qalalyq jáne 13 oblystyq balalar aýrýhanasynyń bazasynda 8130 balalar tósegi ashylǵan.
Respýblıkalyq deńgeıde úsh negizgi ortalyqta - Astana qalasyndaǵy Ana men bala ǵylymı ortalyǵynda, Pedıatrıa jáne balalar hırýrgıasy ǵylymı ortalyǵy men Almaty qalasyndaǵy Aqsaı ýnıversıtettik klınıkasynda 815 tósek bar.
Joǵary tehnologıalyq medısınalyq kómek kórsetý, dıagnozdy naqtylaý jáne odan ári júrgizý tásilin aıqyndaý úshin balalar respýblıkalyq deńgeıdegi ortalyqtarǵa jatqyzylady.
"2022 jyly ambýlatorıalyq deńgeıde 118 mln balalardy konsýltasıalyq-dıagnostıkalyq qabyldaý júrgizildi, táýlik boıy stasıonar jaǵdaıynda 576 myń bala emdeldi, balalarǵa 100 myńnan astam ota jasaldy", - dep habarlady vıse-mınıstr.
Profılaktıkalyq baǵytqa keletin bolsaq, V Dýdnıktiń aıtýynsha, qabyldanyp jatqan sharalar nátıjesinde 2022 jyldyń 11 aıynyń qorytyndysy boıynsha ótken jyldyń sáıkes kezeńimen salystyrǵanda balalardy skrınıngtermen qamtý 3-ten 12% - ǵa deıin ulǵaıdy. Osylaısha, neonataldy skrınıngtik qamtý 91%, aýdıologıalyq 75%, psıhofızıkalyq 86%, oftalmologıalyq 92% qurady.
Balalardyń densaýlyǵyn nyǵaıtý maqsatynda jyl saıyn týǵannan 18 jasqa deıingi balalarǵa profılaktıkalyq tekserýler júrgiziledi.
Aǵymdaǵy jyly 0-den 18 jasqa deıingi balalardy profılaktıkalyq tekserý paketteri zerthanalyq zertteýlerdiń qosymsha ádisterin engizýmen qaıta qaralyp, keńeıtildi. Barlyǵy 11 aıdyń ishinde profılaktıkalyq tekserýlermen 4,5 mln. bala qamtyldy.