Jyl saıyn dúnıe júzinde, onyń ishinde Qazaqstanda 1 qazan Halyqaralyq qarttar kúni retinde atalyp ótedi. Respýblıkada jasy boıynsha 2,5 mıllıonnan astam zeınetker turady. Árbir azamattyń laıyqty qartaıýyn qamtamasyz etý – Úkimettiń áleýmettik saıasatynyń basty mindetteriniń biri.
QR Áleýmettik kodeksiniń 197-babynyń 3-tarmaǵyna sáıkes eńbek sińirgen jyldary úshin zeınetaqy tólemderiniń mólsherin jyl saıyn arttyrý respýblıkalyq búdjet týraly zańda tıisti qarjy jylyna belgilengen mólsherde júzege asyrylady, - dep habarlaıdy Aqshamnews.kz sala mınıstrligine silteme jasap.
Osylaısha, 2025 jyldyń 1 qańtarynan bastap yntymaqty zeınetaqy mólsheri 8,5%-ǵa ulǵaıtyldy jáne eń tómengi kúnkóris deńgeıiniń kóleminiń ózgerýine baılanysty bazalyq zeınetaqy mólsheri ındeksteldi.
Memleket basshysynyń tapsyrmasyna sáıkes bazalyq zeınetaqynyń mólsherin kezeń-kezeńimen arttyrý jalǵasýda. 2025 jyldyń 1 qańtarynan bastap zeınetaqynyń eń tómengi mólsheri eń tómengi kúnkóris deńgeıiniń 65-ten 70%-ǵa, al eń joǵarǵysy 105-ten 110%-ǵa deıin ósedi.
Sonymen qatar Qazaqstan Respýblıkasynyń Eńbek jáne halyqty áleýmettik qorǵaý mınıstrligi qart adamdardy qoldaý, olarǵa áleýmettik qyzmet kórsetý deńgeıin arttyrý, qoǵamdyq ómirge tartý boıynsha sharalardy iske asyrýda.
Respýblıkada 127 Belsendi uzaq ómir súrý ortalyǵy ashylyp, jumys isteýde. 2025 jyly olardyń jumys isteýine jergilikti búdjetterden bólingen qarajattyń jalpy somasy 7,5 mlrd teńgeni qurady.
Belsendi uzaq ómir súrý ortalyqtary «bir tereze» qaǵıdaty boıynsha úsh baǵytta jumys isteıdi: belsendi uzaq ómir súrý, densaýlyq mádenıeti jáne qoǵammen baılanys. Ortalyqtardyń qyzmeti egde jastaǵy adamdardyń ómir súrý sapasyn jaqsartýǵa, ónimdi jáne belsendi uzaq ómir súrýdi yntalandyrýǵa, onyń ishinde júıeli bos ýaqytty uıymdastyrýǵa (ıoga, skandınavıalyq júris, sıfrlyq saýattylyqty arttyrý, motıvasıalyq jáne kásipkerlik kýrstar, aǵylshyn tili kýrstary jáne t.b.), qarttardyń erkindigin qamtamasyz etýge, qoǵam ómirine qatysýǵa baǵyttalǵan.
1 qazanda elimizde Qarttar kúnine oraılastyrylǵan aılyq bastalady. Oblystardyń, qalalar men aýdandardyń ákimderi, kásiporyndar men uıymdardyń basshylary aǵa býyn azamattaryn áleýmettik qoldaý jónindegi is-sharalardy, eńbek ujymdarynda kezdesýlerdi, ambýlatorıalyq-emhanalyq uıymdarda Ashyq esik kúnderin jáne basqalardy ótkizetin bolady.
Halyqaralyq qarttar kúni 1990 jyly 14 jeltoqsanda Birikken Ulttar Uıymy Bas Assambleıasynyń 45-sessıasynda jarıalanǵanyn esterińizge sala keteıik.
Ony ótkizýdiń basty maqsaty – qarıalardyń memleket pen qoǵam aldyndaǵy eńbegin qurmetteý jáne moıyndaý, sondaı-aq olardyń problemalary men qajettilikterine nazar aýdarý, ómir súrý sapasyn arttyrý qajettiligi, olarǵa jalpyǵa birdeı qamqorlyq kórsetý.