Bıyl bul maqsattarǵa 537,1 mıllıard teńge bólindi.
Qazaqstan Úkimeti bıyl ana men balany áleýmettik qoldaýǵa 898 mlrd teńgeden astam qarajat qarastyrylǵanyn jetkizdi, dep habarlaıdy Almaty-akshamy.kz.
«Balaly otbasylardyń quqyǵyn jáne olardyń zańdy múddesin qorǵaý - memleket saıasatynyń basty baǵyttarynyń biri. Qazirgi tańda 1,6 mln balaly otbasy áleýmettik tólem men járdemaqy alady. Ana men balany áleýmettik qorǵaý kópdeńgeıli áleýmettik kómek pen áleýmettik saqtandyrý júıesi arqyly júzege asady. Júıege búdjetten tólenetin járdemaqynyń bes túri men Memlekettik áleýmettik saqtandyrý qorynan tólenetin tólemniń úsh túri kiredi. Bıyl respýblıkalyq búdjetten bul maqsattarǵa 537,1 mlrd teńge bólindi. Bul byltyrmen salystyrǵanda 13,3%-ǵa kóp (2021 j. - 473,9 mlrd teńge). Memlekettik áleýmettik saqtandyrý qorynan 361,3 mıllıard teńge qarastyrylǵan (2021 j. – 295,8 mlrd teńge)», - delingen Eńbekmıni baspasóz qyzmetiniń habarlamasynda.
Memleket bazalyq deńgeıde bala týýyna baılanysty respýblıkalyq búdjetten birjolǵy járdemaqy tóleıdi. Onyń mólsheri 120 840 teńge men (birinshi-úshinshi balaǵa) 200 340 (tórt jáne odan da kóp balaǵa) teńge aralyǵynda. Bıylǵy 4 aıda járdemaqy 134,1 myń adamǵa berildi (18,4 mlrd teńge).
Jumys istemeıtin áıelderge 1 jasqa deıingi balanyń kútimi boıynsha aı saıynǵy járdemaqy qarastyrylǵan. Onyń mólsheri otbasyndaǵy bala sanyna qaraı esepteledi. Járdemaqy mólsheri 18 317 teńge (bir balaǵa) men 28 302 (tórt jáne odan kóp balaǵa) teńgeniń aralyǵynda. Bıyl járdemaqynyń bul túri 46,5 myń adamǵa berildi (4,7 mlrd teńge).
2020 jyldyń 1 qańtarynan bastap birge turatyn 4 jáne odan da kóp kámelet jasyna tolmaǵan balasy bar nemese kúndizgi oqý nysanynda bilim alatyn 23 jasqa deıingi stýdent balalary bar kóp balaly otbasylarǵa tabysyna qaramastan memlekettik járdemaqy tólenedi. Onyń mólsheri bala sanyna qaraı 50 976 teńgeden bastap (4 bala) 203 520 teńgege (16 bala) deıin jetedi. Bıylǵy 4 aıda járdemaqynyń bul túrin 495 myńnan astam otbasy aldy (110,1 mlrd teńge).
Kóp balaly analardyń dárejesin kóterý úshin de memlekettik járdemaqy taǵaıyndalǵan. Ol «Altyn alqa» jáne «Kúmis alqa» alǵan kóp balaly analarǵa tabysyna qaramastan tólenedi. Qazir járdemaqy mólsheri 20 352 teńge. Jyl basynan beri 227,6 myń adamǵa 17,9 mlrd teńge tólendi.
Budan bólek múgedektigi bar balanyń kámelet jasyna jetkenge deıingi kútimi boıynsha respýblıkalyq búdjetten járdemaqy tólenedi. Onyń mólsheri - 52 345 teńge. Qazirgi tańda bul járdemaqy 95,5 myń otbasyna berildi (19,8 mlrd teńge). Múgedektigi bar bala kámelet jasyna tolǵan soń múgedektiktiń birinshi toby belgilense, onda birinshi toptaǵy múgedektigi bar adamnyń kútimi boıynsha járdemaqy tólenedi. Onyń da mólsheri - 52 345 teńge. Bıyl bul járdemaqyny 30 myńnan astam otbasy aldy (6,5 mlrd teńge). Tólemniń bul túri múgedektik boıynsha járdemaqydan bólek tólenedi.
Mindetti áleýmettik saqtandyrý júıesine qatysatyn jumys isteıtin áıelderge jumys berýshilerdiń esebinen túsetin áleýmettik jarnalardyń negizinde Memlekettik áleýmettik saqtandyrý qorynan áleýmettik tólem qarastyrylǵan.
Memlekettik áleýmettik saqtandyrý qorynan tólenetin memlekettik járdemaqylardan bólek júktiligine, bosanýyna jáne jańa týǵan bala asyrap alýyna baılanysty tabysynan aıyrylǵan jaǵdaıda birjolǵy áleýmettik tólem taǵaıyndalǵan. Tólem alýshynyń quqyǵy ýaqytsha eńbekke jaramsyzdyq paraǵynda (aýrýhana paraǵy) kórsetilgen júktiligi jáne bosanýy boıynsha demalys bastalǵan kúnnen kúshine enedi. Birjolǵy tólem demalystyń barlyq kúnine tólenedi. Onyń mólsheri Memlekettik áleýmettik saqtandyrý qoryna bir jyldaǵy ortasha aılyq tabystan túsetin áleýmettik jarnaǵa jáne aýrýhana paraǵy berilgen kúnderge baılanysty. Qazir bul áleýmettik tólemniń ortasha mólsheri - 677,6 myń teńge. Jyl basynan beri bul tólem 81,8 myń adamǵa berildi (48,8 mlrd teńge).
Memlekettik áleýmettik saqtandyrý qorynan 1 jasqa deıingi bala kútimine baılanysty tabysynan aıyrylý boıynsha aı saıynǵy tólemder de tólenedi. Tólem alýshynyń quqyǵy bala týǵan kúnnen, jańa týǵan balany asyrap alý jóninde sot sheshimi kúshine engen kúnnen nemese qamqorshy taǵaıyndalǵan kúnnen bastap kúshine enedi. Tólem jańa týǵan balany kútýmen aınalysatyn jáne tabysynan aıyrylǵandarǵa tólenedi. Tólem mólsheri tólem alýshynyń quqyǵy kúshine engenge deıingi sońǵy 2 jyldaǵy ortasha aılyq tabysynyń 40%-nyń shamasynda. Bıyl qańtar men sáýir aılarynyń aralyǵynda tólemniń bul túrin 448 myń adam aldy (56,6 mlrd teńge).
Budan bólek asyraýshysynan aıyrylý jaǵdaıy boıynsha bazalyq járdemaqylarǵa qosymsha búdjet qarajaty esebinen mindetti áleýmettik saqtandyrý júıesine qatysatyn ákesiniń nemese anasynyń qamqorlyǵynsyz qalǵandarǵa Memlekettik áleýmettik saqtandyrý qorynan áleýmettik qoldaý kórsetiledi. Asyraýshysynan aırylý jaǵdaıy boıynsha tólenetin bul áleýmettik tólemdi bala 18 jasqa deıin alýǵa quqyly. Eger bala kúndizgi oqý nysanynda bilim alatyn stýdent bolsa, onda bul áleýmettik tólemdi 23 jasqa deıin alýǵa quqyly. Aı saıynǵy tólem mólsheri Memlekettik áleýmettik saqtandyrý qoryna 2 jyldaǵy ortasha aılyq tabystan túsetin áleýmettik jarnaǵa, qaraýsyz qalǵandar sanyna jáne mindetti áleýmettik saqtandyrý júıesine qatysý ótiline baılanysty. Bıylǵy 4 aıda tólemniń bul túrin 55,7 myń adam aldy (6,8 mlrd teńge).
Bıyl atalǵan áleýmettik tólemderge Memlekettik áleýmettik saqtandyrý qorynan 361,3 mıllıard teńge qarastyrylǵan.