Qazaqstanda mádenıet salasynda 1 mln-nan astam balany qamtıtyn mádenı jobalar qolǵa alynǵan.
Bul týraly QR Mádenıet jáne sport mınıstri Dáýren Abaev Úkimet otyrysynda aıtty, dep habarlaıdy Almaty-akshamy.kz QazAqparatqa silteme jasap.
«Mádenıet jáne sport mınıstrligi Balalar jylyn ótkizý aıasynda berilgen barlyq tapsyrma men mindetter boıynsha belsendi jumys atqaryp jatyr. Barlyq jumys balalardyń sapaly jáne qoljetimdi bilim alýyn, shyǵarmashylyq turǵydan tolyqqandy damýyn qamtamasyz etýge, olardyń sporttyq jáne shyǵarmashylyq áleýetin arttyrýǵa baǵyttalǵan», - dedi D.Abaev.
Onyń aıtýynsha, mádenıet salasynda 1 mln-nan astam balany qamtıtyn birneshe iri joba qolǵa alynǵan.
«Atap aıtqanda, respýblıkalyq «Ulaǵatty urpaq» mádenı-bilim berý onlaın jobasy qolǵa alyndy. Joba saıttar men áleýmettik jelilerde júrgiziledi. Qazirgi tańda qaralym sany 986 myńǵa jetip otyr, jyl sońyna deıin 2 mln qaralymǵa barady dep kútilýde. Bul óte aýqymdy qyzyq joba. Oqýshylar úıden shyqpaı-aq, vırtýaldy saıahat jasap, opera, balet, drama óneriniń úzdik úlgilerin tamashalap, qazaqstandyq jáne sheteldik fılmder men múltfılmderdi kóre alady. Dárisker retinde belgili mádenıet jáne óner qaıratkerleri, shyǵarmashylyq JOO-lardyń profesorlyq-oqytýshylyq quramy 20 saıtqa 5 baǵyt boıynsha eki tilde ázirlengen 402 beınesabaq tolyq engizildi. Mysaly, mýzykalyq óner, kınematografıa, beıneleý óneri, teatr jáne Kıeli Qazaqstan týraly», - dep túsindirdi mınıstr.
Sonymen birge «Oqýshynyń mádenı normatıvi» jobasy elimizdegi 1510 mektepke engizilgen. Bul jalpy mektepterdiń 20%-yn quraıdy. Jyl sońyna deıin bul kórsetkishti 30%-ǵa jetkizý josparlanǵan.
«Balalar ádebıetine arnalǵan «Dana bala» (www.danabala.kz) veb-saıtynda qazir 100-den astam qazaqstandyq avtordyń kitaptary toptastyrylǵan. Jyl sońyna deıin saıtqa 5000 kitap ornalastyrylady. Bul – balalarǵa arnalǵan jalǵyz elektrondy kitaphana. Odan bólek, balalar shyǵarmashylyǵyna arnalǵan «Talanttar aramyzda» respýblıkalyq festıvál-kórme ótkizildi. Festıvál qorytyndysy boıynsha balalarǵa 16 nomınasıa berildi. Ahmet Baıtursynuly atyndaǵy úzdik oqýshy, Qadyr Myrzalıev atyndaǵy úzdik aqyn, Álkeı Marǵulan atyndaǵy úzdik arheolog, Asqar Jumadildaev atyndaǵy úzdik ónertapqysh, Quman Tastanbekov atyndaǵy úzdik akter, Bıbigúl Tólegenova atyndaǵy úzdik ánshi, Dına Nurpeıisova atyndaǵy úzdik kúıshi, Qajymuqan Muńaıtpasov atyndaǵyv úzdik sportshy dıplomdary berildi», - dedi mınıstr.
Al «Ájemniń ertegileri» onlaın-jobasy 31 myń balany qamtıdy. Jyl sońyna deıin bul kórsetkish 40 myńǵa jetedi dep josparlanyp otyr. Balalar shyǵarmashylyǵyna arnalǵan «Meıirim» ınklúzıvti festıvalinde erekshe bilim berýdi qajet etetin balalar úshin saz balshyq terapıasy, kıiz basý, ıntýıtivti jıvopıs, plasılın syndy 6 baǵytta sheberlik synyptary uıymdastyrylady.
«Balalardy qorǵaý kúnine oraı «Jazǵy kıno» aýqymdy áleýmettik jobasy bastaldy. Jaz boıy kóp balaly, kómekke muqtaj, áleýmettik az qamtylǵan otbasylardyń balalary men jasóspirimderge tegin kıno kórsetilimder uıymdastyrylady. Bul «Qazaqkonsert» memlekettik konserttik uıymynyń jobasy jáne «Qazaqfılm» AQ, «Ulttyq kınony qoldaý ortalyǵy» AQ-men birge júzege asyrylady», - dedi Dáýren Abaev.