Almatyda krımınaldyq polıtsıya qyzmetkerlerí adam kóp shoǵyrlanatyn oryndarda jasalǵan bírqatar qalta ūrlyǵyn áshkereledí, - dep habarlaıdy Aqshamnews.kz.
Jedel ízdestíru ís-sharalarynyń nátıjesínde úsh kúdíktí ūstaldy. Kúdíktílerdíń ekeuí bír toptyń qūramynda áreket etken. Olar sauda úılerínde, azyq-túlík dúkenderínde jáne adam kóp júretín ózge de oryndarda jańa jyl aldyndaǵy qarbalas pen azamattardyń beıqamdyǵyn paıdalanyp, qylmys jasaǵan. Qazírgí uaqytta olardyń kemínde 12 qalta ūrlyǵy deregíne qatysy bary dáleldendí. Anyqtalǵandaı, atalǵan azamattar būǵan deıín de bótenníń múlkín ūrlau boıynsha qylmystyq jauapkershílíkke tartylǵan. Taǵy bír kúdíktí qylmysty jalǵyz ózí jasaǵan. Ol qoǵamdyq kólíkte ūrlyq jasaumen aınalysqan. Būl azamattyń kemínde 7 qylmystyq epızodqa qatysy bary dáleldendí. Barlyq kúdíktíler ūstalyp, uaqytsha ūstau ızolyatoryna qamaldy. Sondaı-aq olardyń ózge de osyǵan ūqsas qylmystarǵa qatysy bary tekserílude. Árbír derek boıynsha sotqa deıíngí tergep-tekseru amaldary bastaldy.
— Qaltakeserler árdaıym adam kóp jınalatyn, azamattardyń nazary bólínetín oryndardy tańdaıdy. Qoǵamdyq kólík, bazarlar, sauda ortalyqtary men dúkender. Dál osyndaı sátterde olar áreket etedí. Ūstalǵandardyń barlyǵy — serıyalyq qylmyskerler, olardyń bír bólígí būryn sottalǵan. Qazírgí uaqytta qosymsha epızodtardy anyqtau jūmystary jalǵasuda, — dedí Almaty qalalsy polıtsıya departamentí krımınaldyq polıtsıya basqarmasynyń bastyǵy Ashat Dauletıyarov.
Sondaı-aq ol qala tūrǵyndary men qonaqtaryn saq boluǵa shaqyrdy.
— Azamattardy jeke zattaryna mūqıyat qarauǵa, telefon men ámıyandy syrtqy qaltada qaldyrmauǵa, qoǵamdyq kólíkte jáne adam kóp shoǵyrlanǵan jerlerde sómkení aldyńyzǵa ūstap júruge shaqyramyz. Saqtyq — qalta ūrlyǵynyń aldyn aludaǵy eń tıímdí qorǵanys, — dep túıíndedí Ashat Dauletıyarov.