Áýe bortyna qurt alyp kirýge bola ma? Jalpy áýekompanıalarda tamaqqa qatysty qandaı erejeler bar? Tolyǵyraq aqshamnews.kz materıalynda.
Erejeler qandaı?
Vietjet Qazaqstan
Áýe kompanıasynyń baspasóz qyzmetiniń habarlaýynsha, qatty qyshqyl sút ónimderin, sonyń ishinde qurtty qol júginde alyp júrýge ruqsat etiledi.
"Olardyń salmaǵyna qatysty arnaıy shekteý joq, eń bastysy - qol júginiń jalpy salmaǵy áýe kompanıasynyń erejesine saı bolýy kerek", - dep naqtylady kompanıa ókilderi.
Al qyshqyl sútti sýsyndarǵa qatysty talap qatańyraq. Qymyz, shubat, aıran jáne basqa da suıyq ónimderdi ushaq salonyna alyp kirýge bolmaıdy.
"Mundaı sýsyndardy júkke ótkizýge ruqsat bar, biraq olar salqyndatylǵan kúıde jáne óndiristik qaptamada bolýǵa tıis. Qaptamada taýardyń shtrıh-kody, óndirýshi týraly aqparat kórsetilýi qajet. Sondaı-aq, kólemi bir jolaýshyǵa 5 lıtrden aspaýy kerek", - dep túsindirdi kompanıa.
FlyArystan
Bul áýe kompanıasynda sút jáne qyshqyl sút ónimderin tasymaldaýǵa bolady, biraq qatań sharttarmen.
- Ónimder tek salqyndatylǵan kúıde qabyldanady;
- Tek tirkelgen júk retinde ótkiziledi (qol júginde bolmaıdy);
- Mundaı júk Limited Release japsyrmasymen tańbalanady (ıaǵnı tasymaldaýshynyń jaýapkershiligi shekteýli).
Qaptamaǵa da qosymsha talaptar bar:
- Ydys berik, germetıkalyq jabylǵan bolýy kerek jáne kóleminiń 4/5 bóligine deıin ǵana toltyrylýǵa tıis;
- Aǵyp ketpeýi úshin ónimdi úsh qabatty polıetılenge orap,
- Syrtynan qatty qorapqa (mysaly, karton qorap) salý qajet.
SCAT
SCAT áýe kompanıasynda erejeler odan da qatań: qyshqyl sút ónimderin ári tirkelgen bagajda da, ári qol júginde de tasymaldaýǵa tyıym salynady.
Erekshelik tek:
- balalar taǵamyna,
- jáne dáriger taǵaıyndaǵan arnaıy dıetalyq taǵamǵa ǵana jasalady.
Air Astana
Air Astana erejelerinde qurt pen basqa qyshqyl sút ónimderin tasymaldaýǵa tikeleı tyıym kórsetilmegen. Degenmen jolaýshylar taǵam alyp júrýge qatysty jalpy talaptardy eskerýi kerek.
Mysaly, aǵyp ketýdiń jáne jaǵymsyz ıistiń aldyn alý úshin ónim tek berik ári bútin qaptamada qabyldanady. Qaptama keminde úsh qabattan turýy kerek, al birinshi jáne sońǵy qabat mindetti túrde tyǵyz polıetılennen jasalýǵa tıis.
Daıyn taǵamdardy tasymaldaýǵa da shart bar: olar suıyq qospasyz bolýy jáne germetıkalyq qaptamamen jabylýy qajet.
Saparǵa qurt nemese basqa qyshqyl sút ónimderin almas buryn, naqty áýe kompanıasynyń talaptaryn aldyn ala qarap shyqqan durys.