2025 jylǵy 20 aqpan men 2 naýryz aralyǵynda Almaty qalasynda ornalasqan ADD Arena sport kesheninde (Nurkent shaǵyn aýdany, 14B) grek-rım, erkin jáne áıelder kúresi boıynsha Qazaqstan Respýblıkasynyń jasóspirimder men jastar arasyndaǵy U17 jáne U20 sanatyndaǵy chempıonaty ótedi.
Atalǵan birinshilikke elimizdiń 17 oblysynan, sondaı-aq Astana, Almaty jáne Shymkent qalalarynan eń úzdik jas balýandar qatysady. Olar Qazaqstan chempıony ataǵy úshin jáne bıylǵy kúntizbelik jylǵa josparlanǵan halyqaralyq jarystarda – Azıa jáne álem chempıonattarynda ulttyq qurama sapynda el namysyn qorǵaý múmkindigi úshin baq synaıdy.
20 aqpanda saǵat 16:30-da U17 jáne U20 jas sanattaryndaǵy grek-rım, erkin jáne áıelder kúresi boıynsha Qazaqstan Respýblıkasynyń chempıonatynyń saltanatty ashylý rásimi ótedi. Bul sharaǵa elimizdiń dańqty balýandary – Olımpıada oıyndarynyń júldegerleri, álem jáne Azıa chempıondary qatysyp, kúres sportynyń úsh stıliniń damýy men tanymaldyǵy artýyna qosqan úlesteri atap ótiledi.
Almaty qalasynyń grek-rım, erkin jáne áıelder kúresi federasıasynyń prezıdenti Omar Alıev aldaǵy týrnırdiń mańyzdylyǵyna toqtalyp ótti:
- Eń aldymen, Qazaqstan Respýblıkasynyń grek-rım, erkin jáne áıelder kúresi federasıasynyń basshylyǵyna osyndaı aýqymdy jarysty ótkizýge senim bildirip, megapolısimizde uıymdastyrý múmkindigin bergeni úshin alǵysymdy bildiremin. Bul jarys – elimizdegi resmı jarystar kúntizbesiniń ashylýy ispettes. Sonymen qatar, Almaty qalasynyń Sport basqarmasyna týrnırdi uıymdastyrýdaǵy qoldaýy úshin erekshe alǵys aıtqym keledi.
Sońǵy bir jyl ishinde Almatyda kúres sportyn damytýda oń ózgerister boldy, bul týraly biz buǵan deıin de BAQ betterinde aıtqan edik. Aldaǵy el chempıonaty jas balýandarymyzǵa óz sheberlikteri men qabiletterin joǵary deńgeıde kórsetýge tamasha múmkindik beredi.
Sportshylarǵa sáttilik tileı otyryp, barsha jankúıerlerdi chempıonatty tamashalap, jas atletterimizdi qoldaýǵa shaqyramyn!