«Jańa Qazaqstan» toby qurylatyn boldy.
Búgin Májilistiń jalpy otyrysynda depýtat Edil Jańbyrshın «Jańa Qazaqstan» atty depýtattyq top qurylatynyn jarıa etti, dep habarlaıdy Almaty-akshamy.kz QazAqparat cilteme jasap.
Mundaı bastama kótergen Parlament depýtattarynyń pikirinshe, Memleket basshysynyń bastamalaryn biraýyzdan qoldaý qajet.
«Prezıdentimizdiń Qazaqstandy jańartamyn, durys arnaǵa buramyn degen aq nıeti bar. Al biz el bolyp ony biraýyzdan qoldaýymyz qajet! Ózderińizge málim, qańtardyń 11 juldyzynda Prezıdent Parlament Májilisiniń jáne keshegi Úkimettiń otyrysynda elimizde atqarylatyn biraz mańyzdy máselelerdi aıqyndap, naqty mindetterdi qoıdy. Jalpy, qoǵam men memleket arasyndaǵy qarym-qatynasta transformasıanyń qajettiligi týyndaǵanyn jáne «Jańa Qazaqstandy» qurý týraly Qasym-Jomart Kemeluly qaıta-qaıta aıtyp júr. Mundaı keshendi transformasıa eń aldymen Parlament qyzmetinde oryn alyp, Májilis qabyrǵasynan bastalýy shart», - dedi depýtat Edil Jańbyrshın.
Májilistiń birqatar depýtaty jańa bastamaǵa qoldaý bildirgen.
«Sondyqtan Parlamenttiń tómengi palatasyndaǵy jumystardy jańa deńgeıge kóterip jáne Prezıdenttiń tapsyrmalaryn Májilis depýtattary tarapynan qadaǵalaý maqsatynda «Jańa Qazaqstan» atty depýtattyq topty qurýdy resmı túrde jarıalaımyz! «Jańa Qazaqstan» depýtattyq toby qoǵamdaǵy eń ózekti máselelerdi der kezinde Parlament tórinde kóterip, turǵyndardyń muń-muqtajdaryn ýaqytynda sheshiýge qyzmet etedi. Úkimetpen birlesip, halyqtyń rýhanıatyn kúsheıtetin, ál-aýqatyn jaqsartatyn zań jobalaryn daıyndaýǵa, saılaýshylarymyzben odan ári tyǵyz qarym-qatynastar ornatýǵa múddeli. «Jańa Qazaqstan» depýtattyq toptyń qoǵamdaǵy barlyq belsendi saıası partıalarmen, narazy toptarmen, úkimettik emes uıymdarmen jáne sarapshylarmen qoıan-qoltyq qyzmet jasaýǵa yntaly jáne daıyn ekenin málim etemiz. Qazaqta «Birlesip kótergen júk jeńil» degen sóz bar! Jańa Qazaqstannyń júgin ulys bolyp birge kótereıik! Prezıdent bastaǵan reformalardy sabotajǵa jibermeı, aıaǵyna deıin jetkizeıik! Barshańyzdy ldiń irgesin nyǵaıtýǵa shaqyramyz!» - dedi Edil Jańbyrshın.
