QR Premer-Mınıstriniń orynbasary Tamara Dúısenova QR Parlamenti Májilisiniń plenarlyq otyrysynda sóılegen sózinde bıylǵy jınalǵan eginniń kólemi jáne aýa raıynyń qolaısyzdyǵyna baılanysty shyǵynǵa ushyraǵan otandyq aýyl sharýashylyǵy ónimderin óndirýshilerin qoldaý sharalary týraly aıtty, dep habarlaıdy Almaty-akshamy.kz.
«Memleket basshysynyń tapsyrmasy boıynsha taýar óndirýshilerdi qoldaý maqsatynda astyqty keptirý úshin 62,5 myń tonna arzandatylǵan dızel otyny bólindi, qarjy ınstıtýttary aıyppul sanksıalaryn qoldanbaı nesıeler men qaryzdardy óteý merzimin uzartýdy júzege asyryp otyr, AÓK sýbsıdıalaýǵa qosymsha qarajat bólý jáne "Azyq-túlik korporasıasynyń" astyqty tikeleı satyp alý máseleleri pysyqtalyp jatyr», — dep atap ótti Tamara Dúısenova.
Onyń aıtýynsha, qazirgi ýaqytta Jambyl oblysynyń sharýalaryna ótemaqy tóleý jumystary júrgizilýde. Esterińizge sala keteıik, óńirde sý tapshylyǵyna baılanysty jergilikti aýqymdaǵy TJ rejımi jarıalanǵan bolatyn. Bólingen qarajat kólemi 3,7 mlrd teńgeni qurady.
İshki naryqta bıdaı baǵasyn turaqtandyrý jáne «sur ımportty» boldyrmaý maqsatynda aýmaǵyna temirjol jáne avto kóligimen astyq ákelýge tyıym salý merzimi 2024 jyldyń 11 sáýirine deıin uzartyldy. Atalǵan shekteý sharalary lısenzıalanǵan elevatorlarǵa, astyq óńdeý jáne qus sharýashylyǵy kásiporyndaryna, sondaı-aq Qazaqstan aýmaǵy arqyly bıdaıdy tranzıttik tasymaldaýǵa qatysty qoldanylmaıdy. Sonymen qatar astyqty óz qajettilikterine paıdalanatyn otandyq óndirýshilerge de shekteý bolmaıdy.
«Bıyl jınalatyn astyqtyń kólemi elimizdi nanmen jáne unmen tolyq qamtamasyz etý úshin jetkilikti bolatynyn atap ótkim keledi», — dedi Tamara Dúısenova.
Sonymen qatar ol Úkimet áleýmettik mańyzy bar azyq-túlik taýarlarynyń baǵasyn turaqtandyrý baǵytynda keshendi jumys atqaryp jatqanyn jetkizdi. Atap aıtqanda, kókónister qunynyń ósýine jol bermeý úshin forvardtyq satyp alý júrgizildi jáne maýsymaralyq kezeńde taýar ıntervensıasy qoldanyldy.
Premer-Mınıstrdiń orynbasary elimizdiń barlyq aımaǵynda turaqtandyrý qorlary bar ekenin eske saldy. Olardyń árqaısysy úshin qajetti azyq-túlik kólemi boıynsha ındıkatıvter ázirlengen. Áleýmettik mańyzy bar taýarlarǵa ústemaqy 15%-dan aspaýy úshin saýda nysandarymen jáne ónim óndirýshilermen 11,5 myńǵa jýyq kelisimshart jasaldy. Sonymen qatar belgilengen talaptar qalaı saqtalyp jatqany da jiti tekseriledi.
«Deldaldyq sqemalardy tekseretin óńirlik komısıalar jyl basynan beri saýda mólsherlemesiniń joǵarǵy shegin buzý boıynsha 696 fakt anyqtady. 814 deldaldyq tizbekke taldaý jasap, 146 zań buzýshylyqty anyqtady. Úkimet qabyldaǵan sharalardyń nátıjesinde 4 aıdan astam ýaqytta áleýmettik mańyzy bar azyq-túlik taýarlary baǵasynyń ındeksi birtindep tómendep keledi», — dep atap ótti Tamara Dúısenova.
Sondaı-aq ol ınflásıanyń tómendeýinde qatysty oń úrdis bar ekenin aıtty. Aldyn ala jasalǵan boljam boıynsha, bıyl onyń kórsetkishi byltyrǵydan edáýir tómen bolady dep kútilip otyr.