Almatyda Qazaqstan halqy Birligi kúni men Qazaqstan halqy Assambleıasynyń 30 jyldyǵyna arnalǵan «Qazaqstan — ortaq úıimiz» atty merekelik is-shara bolyp ótti.
Atalmysh sharany Alataý aýdanyndaǵy «Shapaǵat» yqshamaýdanynda ornalasqan №151 jalpy bilim beretin mektep pen Almaty qalasyndaǵy dúngender qoǵamynyń etnomádenı ortalyǵy janyndaǵy Analar keńesi birlesip uıymdastyrdy.
Almaty-ulttar dostyǵy men kelisimniń ortalyǵy. Búginde munda birneshe ult meken etedi. Sondyqtan bul tek bir oqý ornynyń merekesi ǵana emes, elimizdiń tatýlyǵy men shynaıy dostyǵynyń saltanat qurǵan kúni boldy. Bir shańyraq astynda tatý-tátti ómir súrip jatqan júzi basqa júregi bir, tili basqa tilegi birneshe ult ókili ózderiniń Otany bolǵan Qazaqstandy jyrǵa qosyp, ánge arqaý etti. Ashyq aspan astynda ótken mereke mádenıetter men dástúrler toǵysyp, bir-birin tolyqtyratyn, beıbitshilik pen kelisimniń shynaıy kórinisine aınalǵan sátke toly boldy.
Saltanatty merekeni mektep basshysy Tolqyn Qarymsaqova ashty.
"Bizdiń mektepte 20 dan astam ulttyń ókili bilim alyp jatyr. Barlyǵy bir atanyń balasyndaı, bir qoldyń salasyndaı. Óıtkeni, bizdiń ortaq mekenimiz-Qazaqstan. Memlekettiń birligi bárinen bıik turýy kerek. Biz osynaý darqan dalada dúnıege keldik, osynda bilim alyp, ómir súrip jatyrmyz. Beıbit eldiń baqytty besiginde terbelgen ár ulttyń balasy erkin bilim alyp, óz ultynyń mádenıetin saqtap, ogy damytýyna barlyq múmkindik bar", -deıdi mektep basshysy.
Keremet kóńil-kúı syılaǵan merekelik sharada ár ulttyń balalary óz halqynyń mádenıetimen tanystyrdy. Ár ulttyń dám-tuzy, ulttyq salt-dástúri keshtiń arqaýyna aınaldy. Mektep oqýshylary somdaǵan sahnalyq kórinister, ulttyq án men bı kesh qonaqtary men yqshamaýdan turǵyndarynyń kóńilinen shyqty. Kelesi kezekte Almaty qalasy boıynsha Qazaqstan dúngender qoǵamynyń tóraǵasy Ábýbakır Voınse óziniń shynaıy sezimin tebirenispen jetkizdi.
"Biz –árqashanda birgemiz. Bul — jaı ǵana uran emes, bul — bizdiń kúndelikti ómirlik ustanymymyz. Qazaqstan — shynymen de bizdiń ortaq úıimiz, Biz osy topyraqta dúnıege keldik, balalarymyz da osy eldiń azamaty. Mine, myna baqytty balalar erteńgi el bolashaǵynyń kepili.
"Meniń qyzym qazaqsha da, oryssha da, dúngen tilinde de sóıleıdi. Búgingi is-sharada ol dúngen bıin bıledi. Biz úshin bul úlken maqtanysh. Osyndaı ortada ósip kele jatqan urpaq – elimizdiń eń basty baılyǵy", - deıdi «Shapaǵat» yqshamaýdanynyń turǵyny, úsh balanyń anasy Aınagúl Baqytbekqyzy. Osynaý keshtiń ótýine uıtqy bolǵan mektep basshysy Tolqyn Tursynqulqyzy men Almaty qalasy dúngen ortalyǵy Analar keńesiniń tóraıymy Rımma Masyrovaǵa erekshe alǵystaryn bildirdi.
Taqyrypqa oraı:
Lýgmar Býlarov, Qazaqstan halqy Assambleıasy men Ulttyq quryltaı múshesi.
"Qazaqstan halqy Assambleıasy 1995 jyly Memleket basshysynyń bastamasymen qurylǵan bolatyn. Sodan beri bul ınstıtýt eldegi etnosaralyq kelisimdi nyǵaıtyp, mádenı ártúrlilikti ulttyq birlikke aınaldyryp keledi. Qazirgi tańda tek Almaaty qalasynda ǵana emes búkil el boıynsha Assambleıanyń bastamasymen túrli etno mádenı is-sharalar, qaıyrymdylyq aksıalar men bilim berý jobalary júzege asyrylyp jatyr. Ystyq yqylasqa toly osynaý sharany elimizdiń bolashaqqa degen seniminiń taǵy bir jarqyn mysaly desem bolady. Oqýshylardyń shyǵarmashylyq áleýeti, ustazdardyń meıirimi men ata-analardyń belsendiligi — munyń bári Qazaqstannyń kópultty, birtutas ári myqty memleket ekenin aıqyn kórsetti".