Coindesk.com dereginshe, BETF tıkerimen jańa qor búgin Astana halyqaralyq bırjasynda (AIX) saýdaǵa shyǵyp, jergilikti jáne sheteldik ınvestorlar úshin qoljetimdi boldy, dep habarlaıdy aqshamnews.kz
Qor tolyqtaı naqty bıtkoınmen qamtamasyz etilgen. Sıfrlyq aktıvterdi saqtaý qyzmetin amerıkalyq BitGo Trust kompanıasy atqarady. Ol aktıvterdi 250 mıllıon dollarǵa deıingi somaǵa saqtandyrǵan.
Ónim AQSH dollarymen nomınasıalanǵan jáne krıptoınvestısıalarǵa qolaıly ıýrısdıksıa men syrtqy saıası táýekelderden qorǵanys usynatyn Astana halyqaralyq qarjy ortalyǵynyń (AIFC) qadaǵalaýymen jumys isteıdi.
BETF ınvestorlarǵa krıptobırjalardy paıdalanbaı nemese jeke kiltterdi saqtamaı-aq bıtkoınge qaýipsiz ınvestısıa salý múmkindigin beredi.
Qordyń iske qosylýy Qazaqstannyń óńirde krıptovalúta quraldaryn engizýdegi kóshbasshylyǵyn aıqyndaıdy jáne elge qosymsha halyqaralyq kapıtal tartýǵa jol ashýy múmkin.
Spottyq bıtkoın-ETF – bul negizgi aktıv retinde naqty bıtkoınge ıe bırjalyq qor túri.
Ortalyq Azıadaǵy kórshiles memleketter – Ózbekstan men Qyrǵyzstan krıptovalútaǵa qatysty saq saıasat ustanyp otyr. Bul Qazaqstandy óńirdegi krıptoınvestısıalar úshin eń ashyq naryqqa aınaldyrady. Qarjy sektoryn ártaraptandyrýǵa umtylǵan el úshin retteletin krıptoprodýkti iske qosý sheteldik kapıtaldy tartýǵa jáne jergilikti naryqty jahandyq sıfrlyq ekonomıkaǵa ıntegrasıalaýǵa múmkindik beredi.
BETF debúti Qazaqstandy AQSH, Kanada jáne Gonkong sıaqty spottyq bıtkoın-ETF-ti maquldaǵan elder qataryna qosty.