Ulttyq ekonomıka mınıstri Serik Jumanǵarınniń aıtýynsha, 7 aıda astyq balamasynda 8,9 mln tonna astyq pen un jóneltildi, dep habarlaıdy aqshamnews.kz
Aıtýynsha, memlekettik saıasat sheńberinde salanyń turaqtylyǵy men tıimdiligin arttyrýǵa baǵyttalǵan AÓK qoldaý sharalary iske asyrylyp jatyr.
Jyl saıyn egis jáne egin jınaý jumystaryna aınalym qarajaty 5% jeńildikti mólsherlememen qarjylandyrylady. Alǵash ret 2025 jylǵy dala jumystaryna rekordtyq 700 mlrd teńge jáne otandyq aýyl sharýashylyǵy tehnıkasynyń lızıńine 250 mlrd teńge bólindi. Egisti qarjylandyrý ótken jylǵy qarashada bastaldy, - dep atap ótti vedomstvo basshysy.
Sonymen qatar ol egisterdi ártaraptandyrýǵa toqtaldy.
Memleket basshysynyń tapsyrmasy boıynsha egisterdi ártaraptandyrý júrgizilýde: bıdaı alqaptary 885 myń gektarǵa qysqartylyp, maıly daqyl sıaqty joǵary marjınaldy daqyl egisteri 1 mln gektarǵa jáne dándi – burshaqty daqyl 278 myń gektarǵa ulǵaıtyldy. Agrotehnıkalyq is-sharalardy ýaqtyly qarjylandyrý sońǵy jyldardaǵy ortasha jyldyq kórsetkishter deńgeıinde ónim jınaýǵa múmkindik beredi, - dedi Serik Jumanǵarın.
Aıtýynsha, astyq eksporty rekordtyq deńgeıge jetken.
Osy jylǵy 7 aıda astyq balamasynda 8,9 mln tonna astyq pen un jóneltildi. Marketıńtik jyldyń qorytyndysy boıynsha astyq ekvıvalentinde 13 mln tonna eksport boljanýda. Astyq eksporty Ortalyq Azıaǵa, Iranǵa, Ázirbaıjanǵa, Reseı, Baltyq jaǵalaýy jáne Qara teńizge aıtarlyqtaı ósti. Marokko, Aljır jáne Vetnamǵa jetkizilim bastaldy. Ósimdik maıy eksporty 7 aıda 384,6 myń tonnaǵa jetse, bir jylǵa boljam 670 myń tonnaǵa jýyq, - deıdi vıse-premer.