Ótken jyly bul kórsetkish $32 mln deıin ósti.
Qazaqstan ótken jyly organıkalyq aýyl sharýashylyǵy ónimderiniń eksportyn $32 mln deıin arttyrdy. Joǵary suranysty eskere otyryp, sala mamandary óndiris kólemin odan ári arttyrý úshin memleketten qoldaý kútedi, dep habarlaıdy Almaty-akshamy.kz Eldala.kz silteme jasap.
«Atameken» palatasynda ORGANIC jobalyq keńsesi aıasynda sala mamandarynyń qatysýymen alǵashqy ashyq otyrys ótti.
"2021 jyly elden $32 mln organıkalyq ónim eksporttaldy, 2019 jyly eksport $15 mln, 2020 jyly $10 mln qurady. Negizgi taýarlar-organıkalyq zyǵyr, bıdaı, soıa, kúnbaǵys, jasymyq bolyp tabylady. Az mólsherde kúnbaǵys maıy, araq pen bal eksporttalady", - dedi UKP Agroónerkásiptik keshendi damytý departamentiniń dırektory Erbol Esenev.
Ol búgingi tańda organıkalyq sharýashylyq 300 gektardan astam jerge júrgiziletinin atap ótti.
Sarapshylar halyqaralyq sertıfıkattaýdyń joǵary qunyn, memlekettik qoldaýdyń jetkiliksizdigin, organıkalyq daqyldardy óndirý jáne satý máselelerinde bilim men tájirıbeniń tapshylyǵyn Qazaqstanda organıkanyń damýyn tejeıtin faktorlar dep ataıdy.
Júıelik máselelerdi sheshý úshin Aýyl sharýashylyǵy mınıstrligi, Qazaq Organic odaǵy, UNION Atameken jáne sala ókilderi jobalyq keńseniń 2022 jylǵa arnalǵan jumys josparyn bekitti. Atap aıtqanda, organıkany damytýdyń jol kartasynyń jobasyn ázirleý, qytaı baǵytyn qosa alǵanda, jańa naryqtarǵa shyǵý múmkindikterin pysyqtaý josparlanýda. Sondaı-aq, jobalyq keńseniń nazarynda: zańnamalyq bazany jetildirý, PGS-Qazaqstan birlesken kepildikter júıesin qurý, oqytý, ǵylymı-tehnologıalyq jáne bilim berýdi qoldaý, qarjylyq qoldaý quraldaryn qaraý, organıkalyq óndirýshilerdiń shyǵyndaryn sýbsıdıalaý máselelerin sheshý.
BUU Damý baǵdarlamasynyń ókili Fırýz Ibragımovtyń aıtýynsha, uıym Qazaqstandaǵy organıkalyq ónim óndirýshilermen tyǵyz baılanysta.
"Biz jobalyq keńseni qoldaýǵa jáne óndirýshilerimizben jáne organıkalyq eginshilik boıynsha seriktesterimizben jumys isteýge daıynbyz", – dep sendirdi ol.
Óz kezeginde Qazaq Organic Union odaǵynyń dırektory Arsen Kerimbekov halyqaralyq baǵdarlamalardyń jumysyn synǵa alyp, organıkany damytý jónindegi jumystyń jańa tásiline kóshýdi usyndy.
"Úkimet organıkamen aınalysatyn kásipkerge sýbsıdıa bergisi keledi. Biz úkimetke esep berýimiz kerek. Sýbsıdıa alý úshin esep berip, qajettiligin dáleldeý qajet. Biz halyqaralyq baǵdarlamalarda qarajat suramaımyz, bizge sizdiń tájirıbeńiz qajet. Bizdiń mamandardy oqytý jetkilikti. Osy baǵytta birge jumys isteıik", - dep usyndy Arsen Kerimbekov.
Kezdesý sońynda kásipkerler men sarapshylar keńse aıasyndaǵy birlesken jumys týraly kelisti.
Jobalyq keńseniń kelesi otyrysynda bilim berý salasyndaǵy organıkany damytý talqylanady.