Jahandyq avtokólik satylymy kúrt tómendegen, birqatar kompanıalar óndiristi toqtatty.
Sebebi álem elderinde jeńil avtokólikter satylymy azaıǵan, dep habarlaıdy Almaty-akshamy.kz Finprom.kz-ke silteme jasap.
Bıyl álemdik avtomobıl naryǵy daǵdarystyq jaǵdaıda.
Máselen, Eýropalyq avtomobıl óndirýshiler qaýymdastyǵynyń málimetteri boıynsha, Eýropada jeńil avtokólikterdiń satylymy sáýir aıyndaǵy kórsetkish boıynsha bir jyl ishinde 20,2%-ǵa tómendep, 830,4 myń avtokólikti qurady. Salystyrar bolsaq, 2021 jyldyń sáýirinde bul kórsetkish 1 mln-nan asqan.
Tikeleı Eýropalyq odaq (EO) elderinde satý kóleminiń tómendeýi 20,6%-dy qurady. Eýropada sektordaǵy satylymnyń eń kóp azaıýy Lıtvada (-34,9%), Italıada (-33%), Shveısarıada (-29,1%), Danıada (-29%), Fınlándıada (-25,8%) jáne Avstrıada baıqalady (−26,6%).
Eýropalyq avtomobıl óndirýshiler qaýymdastyǵynyń málimetteri boıynsha, teris dınamıka jartylaı ótkizgishterdiń (chıpterdiń) tapshylyǵyna baılanysty jańa avtokólikterdi jetkizýdegi kidiristerge baılanysty. Al Reseı men Ýkraınadaǵy geosaıası daǵdarys saldarynan logıstıkalyq máseleler kúsheıgen. Buǵan qosa, Qytaıdaǵy COVID-19-dyń órshýi sektorǵa keri áser etýde.
Avtokólik kompanıalary boıynsha Eýropada 2022 jyldyń sáýir aıynda satylymnyń kúrt tómendeýi Stellantis-te baıqalady: kórsetkish birden 28% tómendedi. Sonymen qatar, Volkswagen Group-tyń satylymy 28%-ǵa, Jaguar Land Rover Group - 27,7%, Mazda - 27,4%, Volvo - 23%, Mercedes-Benz - 22,6%-ǵa quldyraǵan.
Chıpterdiń jetispeýshiligine baılanysty Stellantis pen Ford ótken aptada Illınoıs, Kentýkkı jáne Ontarıodaǵy zaýyttarda óndiristi ýaqytsha toqtatty. Bul týraly Foley Automotive kompanıasynyń 2022 jylǵy 18 mamyrdaǵy esebinde jazylǵan.
Daǵdarystan zardap shekken avtokólik modelderiniń qatarynda Jeep Cherokee, Ford Escape, Ford Edge, Lincoln Corsair jáne Lincoln Nautilus bar. Buǵan qosa, ótken aptada Stellantis bólshekterdiń jetispeýshiligine baılanysty Vındzordaǵy (Ontarıo) shaǵyn avtobýs zaýytynda óndiristi ýaqytsha toqtatty.
Óz kezeginde, Japonıada Toyota Qytaıdaǵy COVID-19 saldarynan engizilgen lokdaýn áserinen mamyr aıynda 12 zaýytta óndiristi 6 kúnge deıin qysqartady, al jahandyq óndiris jospary shamamen 50 000 kólikke azaıdy. Sonymen qatar, Toyota joǵary shıkizat shyǵyndary men jartylaı ótkizgishterdiń úzdiksiz tapshylyǵy kompanıanyń kelesi jyldaǵy kirisin shamamen 20% tómendetýi múmkin ekenin atap ótti.
«Alaıda qazirgi ekonomıkalyq turaqsyzdyq boljam jasaýdy qıyndatyp otyr», – dep habarlady kompanıada.
AQSH-ta jańa jeńil kólikterdiń satylymy bir jyl burynǵydan 56,3%-ǵa, Qytaıda – 43,4%-ǵa, Japonıada – 14,4%-ǵa, Ońtústik Koreıada – 11,8%-ǵa, Kanadada – 8,4%-ǵa, Meksıkada – 1%-ǵa tómendedi. Qoryta aıtqanda, kólik daǵdarysy álemniń barlyq elderin qamtydy.