2025 jylǵy 23–27 tamyz aralyǵynda Almaty qalasyna Saýd Arabıasy Koróldiginiń Qajylyq jáne umra mınıstri Taýfıq ben Faýzan Ar-Rabıa bastaǵan delegasıa resmı saparmen keldi, dep habarlaıdy aqshamnews.kz
İssapar aıasynda taraptar qajylyq jáne umra salasyndaǵy yntymaqtastyqty damytý, qajylyq ınfraqurylymyn jetildirý, qajylarǵa kórsetiletin qyzmetterdiń sapasyn arttyrý, sondaı-aq mádenı jáne rýhanı baılanystardy keńeıtý máselelerin talqylady.
Delegasıa quramynda Saýd Arabıasy Qajylyq jáne umra mınıstrliginiń ókilderi, Mekke men Mádına qalalarynyń tıisti mekeme mamandary boldy. Qazaqstan tarapynan kezdesýge QR Mádenıet jáne aqparat vıse-mınıstri Qanat Jumabaıuly Ysqaqov qatysty.
Saýd Arabıasy Qajylyq jáne umra mınıstri Taýfıq ben Faýzan Ar-Rabıa bul sapardyń mańyzyna toqtalyp, Qazaqstan men Saýd Arabıasy arasyndaǵy tarıhı ári rýhanı baılanystardyń erekshe ekenine nazar aýdardy.
– Bul meniń Qazaqstanǵa ekinshi resmı saparym. Alǵash ret 2022 jyly elderińizge kelgen edim. Qazirgi kezdesýimizdiń negizgi maqsaty – Qazaqstannan keletin qajylardyń qajylyq rásimderin jeńildetý jáne qyzmet sapasyn jaqsartý. Sonymen qatar, eki el arasyndaǵy týrızmdi damytý, mádenı baılanystardy nyǵaıtý da basty nazarda. Osyǵan oraı Qazaqstan musylmandary dinı basqarmasynyń tóraǵasy Naýryzbaı qajy Taǵanulymen, sondaı-aq Mádenıet jáne aqparat vıse-mınıstri Qanat Ysqaqovpen jemisti kelissózder júrgizdik. Saýd Arabıasy tarapynan qajylardyń saparyn ońtaılandyrý, tarıhı mekenderge zıarat etý múmkindikterin keńeıtý jáne tikeleı áýe qatynastaryn arttyrý máseleleri qarastyryldy, – dedi mınıstr.
Óz kezeginde Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly eki el arasyndaǵy rýhanı qarym-qatynastyń artyp kele jatqanyn atap ótti.
– Qajylyq – musylmannyń bes paryzynyń biri. Egemendik alǵannan beri jyl saıyn myńdaǵan otandastarymyz qasıetti saparǵa attanyp keledi. Bıyldyń ózinde tórt jarym myńǵa jýyq qazaqstandyq qajylyq paryzyn ótep qaıtty. Saýd Arabıasy tarapynan kórsetilip otyrǵan qoldaý – osy rýhanı baılanystardyń naqty kórinisi. Qajylyq saparyna qatysty vızalyq rásimderdiń jeńildetilýi, tikeleı áýe reısteriniń ashylýy, qyzmet sapasynyń artýy – osy kelissózderdiń jemisi, – dedi Bas múftı.
Sonymen qatar Naýryzbaı qajy Taǵanuly Saýd Arabıasynyń Qazaqstanǵa degen qurmetin erekshe atap ótti. Ol aldaǵy ýaqytta da eki el arasyndaǵy yntymaqtastyqtyń arta túsetinine senim bildirdi.
Sapar aıasynda eki el ókilderi qajylardyń qaýipsizdigi, jol qatynastaryn jetildirý, tarıhı-dinı oryndarǵa zıarat jasaý múmkindikterin keńeıtý baǵytyndaǵy naqty usynystardy qarastyrdy.
Osylaısha, Saýd Arabıasy Qajylyq jáne umra mınıstriniń Almatyǵa jasaǵan sapary Qazaqstan men Saýd Arabıasy arasyndaǵy mádenı, rýhanı ári týrısik yntymaqtastyqty jańa deńgeıge kóterýge jol ashty.