Elimizdiń kandıdatýrasyn osy úkimetaralyq uıymǵa múshe 119 memlekettiń barlyǵy qoldady.
QR SİM aqparaty boıynsha, Qazaqstan Respýblıkasy resmı túrde Halyqaralyq áskerı medısına komıtetine (HÁMK) baqylaýshy retinde qabyldandy, dep habarlaıdy Almaty-akshamy.kz
2022 jyly QR Belgıadaǵy Elshiliginiń bastamasymen QR Syrtqy ister mınıstrligi QR Qorǵanys mınıstrligimen birlese memleketimizdiń tıisti ótinishin engizýdi pysyqtady. Aǵymdaǵy jyldyń 5-9 qyrkúıegi aralyǵynda uıymnyń Brússelde ótken kezekti álemdik kongresi barysynda múshe memleketter ony oń baǵalaǵan.
Qazaqstan delegasıasyna arnaǵan sózinde HÁMK 44-shi álemdik kongresiniń tóraǵasy Devıd Smıt Qazaqstannyń áskerı-medısınalyq qyzmeti áskerı medısına salasyndaǵy halyqaralyq yntymaqtastyqqa mazmundy úles qosa alatynyna senimdi ekenin jetkizdi.
Óz kezeginde, kezdesýge qatysýshylar aldynda sóz sóılegen Qazaqstannyń Belgıadaǵy Elshisi Marǵulan Baımuhan HÁMK-ke baqylaýshy mártebesin alý qazaqstandyq mamandarǵa uıymnyń múshe memleketterdiń áskerı-medısınalyq qyzmetteriniń kásibı deńgeıin kóterýge baǵyttalǵan barlyq is-sharalaryna qatysýǵa múmkindik beretinin jáne osy mańyzdy salada tájirıbe almasý úshin paıdaly alańdy qamtamasyz etetinin basa aıtty.
Qazaqstan Respýblıkasynyń Qarýly Kúshterinde áskerı qyzmetshilerdiń densaýlyǵyn qorǵaý jáne medısınalyq járdemge quqyqtaryn iske asyrýdy qamtamasyz etetin medısınalyq qamtamasyz etýdiń kóp deńgeıli júıesi qalyptasqan jáne senimdi jumys isteýde. Búginde Qazaqstannyń áskerı medısına júıesi 20 áskerı-medısınalyq mekemeni jáne 130-dan astam medısınalyq bólimsheni qamtıdy.
Aıta ketsek, HÁMK álemdegi qarýly kúshterdiń medısınalyq qyzmetteri arasyndaǵy yntymaqtastyqty nyǵaıtý maqsatynda 1921 jyly qurylǵan. Komıtet jarǵysy men tarıhı dástúrine sáıkes Bas hatshysynyń keńsesi Belgıada ornalasady.
Bul halyqaralyq uıym BUU, Dúnıejúzilik densaýlyq saqtaý uıymy jáne Halyqaralyq Qyzyl Kres Komıtetimen tyǵyz yntymaqtastyqta.
Onyń negizgi mindetteri – barlyq memleketterdiń áskerı medısınalyq qyzmetteri arasyndaǵy kásibı yntymaqtastyq baılanystaryn nyǵaıtý; ǵylymı zertteýlerdi ilgeriletý; áskerı medısına úshin mańyzdy máseleler boıynsha oqytý, atap aıtqanda qarýly kúshterdiń medısınalyq qyzmetiniń jas ofıserleriniń biliktiligin arttyrý kýrstaryn uıymdastyrý .