2025 jylǵy qarasha aıynyń qorytyndysy boıynsha Qazaqstan Respublıkasynda jyldyq ınflyatsıya deńgeıí 12,4 paıyzdy qūrady. Būl kórsetkísh qazan aıymen salystyrǵanda azdap tómendegenímen (12,6%), eldegí baǵa ósímíníń álí de joǵary ekenín kórsetedí. Al bír aıdaǵy ınflyatsıya 0,8 paıyz boldy. Aqshamnews.kz tílshísí Ūlttyq stastıtıka byurosynda jarıyalanǵan málímetter negízínde osy taqyrypty taldap kórdí.
Inflyatsıyany ne ósíríp jatyr?
Resmı derekterge sáıkes, jyldyq ınflyatsıyanyń negízgí qozǵaushy kúshterí - azyq-túlík tauarlary, aqyly qyzmetter jáne azyq-túlík emes tauarlar.
- Azyq-túlík tauarlary bír jylda 13,4% qymbattady
- Aqyly qyzmetter baǵasy 12,3% óstí
- Azyq-túlík emes tauarlar 11,2%-ǵa qymbattaǵan
Inflyatsıyanyń jalpy deńgeıíne eń úlken úlestí azyq-túlík pen alkogolsíz susyndar qosty - 5,2 paıyzdyq tarmaq. Būdan bólek, densaulyq saqtau qyzmetterí (1,5 p.t.) jáne tūrǵyn úı-kommunaldyq qyzmetter (1,2 p.t.) de baǵa ósímíne eleulí áser ettí.
Azyq-túlík: et pen maı alda tūr
Azyq-túlík tauarlary arasynda eń joǵary ósím et jáne et ónímderínde tírkeldí - bír jylda 21,7%. Būl ınflyatsıyaǵa 2,45 paıyzdyq tarmaq qosty.
Sondaı-aq:
- maı jáne toń maı - 6,4%
- alkogolsíz susyndar - 15,7%
- sút ónímderí - 10,8 %
- jemíster men kókóníster - 9%
Baǵanyń mūndaı ósuí mausymdyq faktorlarmen qatar, óndírís shyǵyndarynyń artuy jáne logıstıkaǵa baılanysty.
Qyzmet kórsetu salasyndaǵy qymbatshylyq
Aqyly qyzmetter ınflyatsıyaǵa 3,7 paıyzdyq tarmaq qosty. Ásírese tūrǵyn úıge qatysty qyzmetter aıtarlyqtaı qymbattaǵan.
- tūrǵyn úıdí jalǵa alu - 15,9%
- tūrǵyn úıdí jóndeu jáne qyzmet kórsetu - 8,2%
- tūrǵyn úı-kommunaldyq qyzmetter - 9,9%
Kommunaldyq qyzmetter íshínde:
- gaz - 15,6%
- elektr energıyasy - 8%
- ortalyqtan jylytu - 10,2%
Tek suyq sudyń baǵasy 12,3 paıyzǵa tómendep, ınflyatsıyaǵa kerí áser etken sanauly kórsetkíshterdíń bírí boldy.
Aımaqtar boıynsha ınflyatsıya: qaı óńírde joǵary?
2025 jylǵy qarashada eń joǵary jyldyq ınflyatsıya tírkelgen óńírler:
- Ūlytau oblysy - 14%
- Aqmola oblysy - 13,8%
- Atyrau oblysy - 13,5%
- Soltústík Qazaqstan oblysy - 13,4%
Al salystyrmaly túrde tómen kórsetkíshter:
- Almaty qalasy - 11,4%
- Mańǵystau oblysy - 11,6%
- Qyzylorda oblysy - 11,7%
Būl aıyrmashylyqtar óńírlerdegí tūtynu qūrylymy, kommunaldyq tarıfter men logıstıkalyq shyǵyndardyń ártúrlílígíne baılanysty.
Qarasha aıyndaǵy baǵa dınamıkasy
Bír aı íshínde:
-
azyq-túlík tauarlary – 1%
-
azyq-túlík emes tauarlar – 0,9%
-
aqyly qyzmetter – 0,3%
Būl kórsetkíshter jyl sońyna qaraı ınflyatsıya qarqynynyń bírshama bayaulaǵanyn ańǵartady.
2025 jylǵy qarashada ınflyatsıyanyń 12,4 paıyz deńgeıínde qalyptasuy - baǵanyń ósuí álí de halyqtyń kúndelíktí shyǵyndaryna aıtarlyqtaı áser etíp otyrǵanyn kórsetedí. Ásírese azyq-túlík baǵasynyń, tūrǵyn úıge qatysty qyzmetterdíń jáne energıya resurstarynyń qymbattauy negízgí faktor bolyp otyr.
Sonymen bírge, aılyq ınflyatsıyanyń bayaulauy men keıbír tauarlar baǵasynyń tūraqtanuy aldaǵy kezeńde ınflyatsıyalyq qysym bírtíndep álsíreuí múmkín degen úmít beredí. Degenmen, baǵa tūraqtylyǵy kóbíne íshkí naryqtaǵy ūsynys, tarıftík sayasat jáne syrtqy ekonomıkalyq jaǵdaılarǵa táueldí bola bermek.
