Oqý-aǵartý mınıstriniń birinshi orynbasary Maıra Meldebekova sabaq barysynda uıaly telefon qoldanǵan oqýshylardyń ata-analaryna qatysty jaýapkershilik máselesine túsinikteme berdi, dep habarlaıdy aqshamnews.kz
Onyń aıtýynsha, elimizde oqý kezinde smartfon paıdalanýǵa tyıym salynǵan. Alaıda eger sabaq josparyna sáıkes aqparattyq tehnologıalardy, elektrondy oqýlyqtardy nemese arnaıy qosymshalardy qoldaný qajet bolsa, muǵalimniń ruqsatymen telefondy paıdalanýǵa bolady.
Vıse-mınıstrdiń málimetinshe, osy talaptardyń buzylýyna baılanysty muǵalimder tarapynan eshqandaı shaǵym túspegen.
"Qoldanystaǵy shekteýlerge qaramastan, sabaq kezinde smartfon ustaǵany úshin oqýshylardyń ata-analaryna aıyppul salý derekteri tirkelgen joq", – dedi Maıra Meldebekova.